2627/2026-2027

Lawngtlai, 12th October 2026 : Vawiin kham District Programme Office, (WCD) Lawngtlai District-bultumin Areopagy Lawngtlai Bazarah  'International Day of the Girl Child 2026' leh 'Project Thaichhawninu Free SSY Account Opening Drive Programme' hman a ni a. Pu H. Zonunmawia, PD (DRDO ) chuan Khuallian niin a hmanpui.

Pu H. Zonunmawia chuan 'International Day of the Girl Child 2026'  chibai bukna neiin, vawiin hun hman chu  hmeichhe naupang  zawng zawngte dikna, zahawmna, an thiamna leh an chanvo tarlanna pawimawh tak a ni tiin khawvel pawhin a ngaipawimawh em em a ni, a ti. Kum tlingloa pasal neih a pawi thu sawiin, kum tling ngeia pasal nei tura hmalak chu khua leh tui tha nihna a nih thu a sawi a. Hmeichhiaten hleilenna an tawh lohna tura thawh te, tanpui an ngaihna zawna tanpuite hi mitin kutah a innghat tak zet tiin hemi lam hawia ke pen turin a sawm a.  Naupangte a bik takin hmeichhe naupang tinte hian zirna tha, hriselna leh inenkawlna tha bakah  inhumhimna tha an neih a pawimawh tak zet a, Sawrkar pawhin theihtawp a chhuah reng thin a ni, a ti. Hmeichhe naupangte  hi  chhungkua, ram leh hnam  hmalam hun atana beiseina êng an ni a, An zinga tam takte chu hmalam hunah hruaitu, zirna lama mi thiam leh khawtlang hmasawnna tichaktu an la ni dawn a ni, a ti. Kum tlingloa inneihna tihtawp leh hmeichhe naupangte dikna chanvo peipun kawnga theihtawp chhuah turin Lawngtlai District- mipuite a sawm a ni.

Project Thaichhawninu chungchang sawiin PD chuan Fanu nei nu leh pa leh enkawltu zawng zawngte chu an fanu hmasawnna leh hmalam hun atana sum vawnna kawng pawimawh tak a nih avangin an fanute  tana 'SSY Account' hawng  turin a sawm nghal bawk.

Vawiin hun hmanna hi Pu V. Vanlaldingliana, Asst. DPO (WCD) chuan kaihruaiin, Pi J. Lalremkimi,OSC leh Pu John Lalpektluanga, Post Master, ten thutawi sawina an nei a. He hunah hian sawm bikte an tel tha hle a,  Pi F. Lalengvari, DMC,DHEW-DPO (WCD) chuan lawmthu sawiin hun a khar.

Hun hman zawh hian 'Free SSY Account' hawnna neih chhunzawm nghal a ni a. Free SSY Account - hi hmeichhe naupang kum 10 hnuailam tan hawn theih niin, Minimum Deposit - Rs. 250 per Year; Maximum Deposit - Rs. 1,50,000 per Year niin kum 21 hnuah  lakchhuah theih  a ni ang.