Vawiin khan CMO Office, Lunglei District bultumin I&PR Conference Hall-ah rannung seh leh a kaihhnawih natna chungchang zirhona ‘Awareness Campaign on Rickettsial Infections Including Scrub Tyhpus ’neih a ni. He hunah hian Lunglei District MJA-te, I&PR leh Health & Family Welfare Department hnathawkte an tel.

Vawiin zirhona ah hian Dr Thani Pachuau, CMO Lunglei leh Dr RSC Vanlalruati, Microbiologist te Resource Person ah tangin Powerpoint presentation hmangin zirtirna an pe a. Dr Thani Pachuau, CMO Lunglei chuan rannung seh natna (Scrub Typhus) hi mite/chiggers (tuhrik lam chi/arthropods family) thenkhat ten an therhdarh a, heng tuhrik bakah hian uihli (fleas) leh hrikhrah (louse) te pawhin scrub typhus an thlen a ni, a ti. Hen natna pu darhtu ber chu sazu lam chi (rodents), ui leh zawhte (ranvulh/pets) atang te an ni tih hmuhchhuah a nih thu a sawi bawk. Rannung seh natna (Scrub Typhus) chu khawvela lo hluar thar natna (Re-Emerging Disease) anih thu sawiin tun hnaiah Health and Family Welfare Department hmalaknain sawrkar damdawiin zawng zawnga hman turin Scrub Typhus test na Weil-Felix test Kit dah tura ruahmanna siam a nih thu a sawi bawk.

Nikum January thlaa Haulawng khuaa Scrub Typhus natna leng chungchang pawh sawilangin CMO chuan National Centre for Disease Control (NCDC), Delhi atangin Central Team mithiam 6 lai lo kalin Joint Investgation neih a ni a. Mihring thisen, sazu thisen leh tuhrik sample-te NCDC Delhi ah an hawn thla a, an zirchianna ah hian Haulawng khua a hrileng kha Scrub Typhus ngei a ni tih ELISA test hmangin an finfiah thu a sawi. H&FW Department Data atangin kum 2012 atanga 7th May, 2019 thleng khan Lunglei District ah Scrub Typhus vei mi 466 hmuhchhuah tawh an ni a, heng zinga mi 5 ten nunna an chan a ni.

Vawiin zirhona hi Lunglei DIPRO Pi C. Lalremruati’n kaihruaiin Pu H. Lalthangliana, Health Educator, CMO Office in lawmthu sawina hun a hmang a ni. Zawhna leh chhanna hun tha tak hman a ni bawk.

 Scrub Typhus laka inveng tura mipuite hriattur pawimawhte:

1.     Sazu lam reng reng (rodent), chaichim, chhimtir, thehlei etc kan in leh a chhehvela an chen/ an pun loh nan theihtawp chhuah tur a ni.

2.     Tin, kan ranvulh a bikin ui leh zawhte te hrilk atangin Scrub Typhus hi kai theih a ni a. chuvang chuan kan ran vulh te enkawl ngun a, tihfai/bualfai ngun a, hrik an nei em, an mutna a thianghlimin hrik an thlah pung em tih te kan ngaihven reng a tul a ni.

3.     Lo nei mi emaw kan nih chuan hnathawh, ram chhuah, feh leh huan kal hnu ah te uluk taka intihfai leh inenkawl ngun a ngai zual hle a ni.

4.     Kan thuamhnaw hrim hrim kan pho te hian hnim chunga pho mai mai loh a tha bawk.

5.     Faina kawngah fimkhur lehzuala, a bikin pheikhawk bun lova vah mai mai te, kawr ha mumal lova hnim zinga kal mai mai te kan fimkhur a ngai hle. Phul leh hlo hnim hnawk lamah a tam duh a ni.