3901/2023-2024

LUNGLEI; the 20^th February, 2024: Vawiin chawhma dar 11:00 khan Convention Centre ,Lunglei-ah ropui tak leh urhsun taka “Mizoram State Day-2024’ lawmna programme hman a ni a.  Programme hi Pi Ramdinliani District Bawrhsap in kaihhruaiin, Pu V.Malsawmtluanga, Lunglei North bialtu MLA leh Vice Chairman, Lunglei High Powered Committee ni bawk  leh Pu T.Lalhlimpuia, Lunglei West bialtu MLA ten khuallian leh khualzahawm niin programme hi an hmanpui.

Khuallian Pu V.Malsawmtluanga chuan thu sawina hun hmangin, Kan hruaitu hmasa te rilru-ah Mizoram hi  ram zalen Independent ram a siam duhna a  lian hle a,Independent te hial an lo sual a, chumi in a rahchhuah chu Mizoram hi india rama State puitling pakhat a lo ni ve ta a ni. Tuna State kan ni hi Pathianin Step by step a min hruaina kawng a niin ka hria. Kan thenawm state Manipur leh Bangladesh atangin  kan mizo hnahthlak unau ten Mizoram hi ral tlan nan an lo hmanga,an awmna state leh rama an tawrhna  te hi a thlawn mai ka ring lo, Pathianin ropui zawka Zo fate min dinchhuah a tumna step niin ka hria a ni. Mizoramin State puitling a nih theihna tur leh a chhunga cheng ten ralmuang taka kan awm theihna tura mahni chaw thleng leibua a, a tha leh zung nasa taka sengtu, vawiina kan Chief Minister lo  ni ta Pu Laduhoma  chungah pawh lawmthu ka sawi a ni.

Amaherawh chu State ralmuang tak hnuaiah hian hnungtawlh zawngin kan thang emaw tih mai tur a ni a, kan State in India rama a berh anihna tam tak hi chhuanawm lo tak, kristian state tan phei chuan zahthlak tling te pawh a ni.Kan in leh lo, kan incheina te a changkan hle laiin, hmasawnna ruhrel tak tak leh ei leh bar-a intodelhna kawngah erawh chuan hmabak kan la ngah hle a ni. Hemi a nih avang hian ZPM Sawrkar chuan Moral Reformation hi a ngai pawimawh hle a, kan hmalakna tur priority hmasa berte zing a mi a ni. Corruption nuaibo tur pawhin keimahni theuh kan inenfiaha, keimahni theuh atanga tan kan lak a ngai a ni. Chuvangin keini  ZPM MLA  te pawhin corruption laka kan hima, mipui ten corruption laka min venhim  theih nan tiin, campaign lai atang tawhin mipui hriatah corrupt loh tura intiam thin kan ni.ZPM sawrkar chuan dinchhuah tuma beih tak taktu, kuthnathawktu te dawmkan hi a thil tum pawimawh berte zing a mi a ni a, chu chu “Ban a kaih” ( hand –holding) policy hi a ni.

Chuvangin  vawiin State Day-2024 kan lawm mek lai hian kan sawrkar hnathawk te pawhin kalphung hlui rilru te kalsan a, kan ram leh pathian tana kalphung thar rilru nena thawk turin ka ngen che u a. Mitin  mahni hmazawn theuhva kalphung thar rilru nen, rinawmna leh taimakna nena hmalam kan pan zel theih nan vawiin State Day-2024 lawmna pual hian duhsakna ka hlan a che u, a ti.

Vawiin programme-ah hian Major K. Vanlalsawmthanga,Divisional Commander, Salvation Army in hunserh a hmang a,Sub Hqrs YMA Lunglei zaipawl ten “Ro min rel sak ang che” ti hla mawi taka remin,Pu Lalthanmawia,Assistant Professor,Lunglei Govt College in "Mizoram State lo pianchhuah dan leh hmasawnna" tih thupuia hmangin power point presentation a pe a.Lunglei naupang  zaithiam Esther Hnamte in zaiin mipui kalkhawm te a awi bawk.

Tichuan Addl.DC  Pu Donny Lalruatsanga’n Vote of thanks a sawi zawhah, 2nd Bn MAP Pipe Band,Lunglei te kaihruaina hnuaiah mipui kalkhawm ten  National Anthem zaiin, vawiin hun hman hi khar a ni ta a ni.

Vawiin  vek khan Convention Centre, Lungleia State Day-2024  lawmna programme hman zawhah, tlailam dar 1:00 khan LUNGLEI STATE DAY OF PRAYER ORGANISING COMMITTEE te bul tumin “Tawngtaina Programme”, Saikuti Hall-a hman leh a ni a. He tawngtaina Programme hi Session 3-ah thenin,  1st Session:  hi Pu Lalzuithanga, Working Chairman, LSDP leh Lunglei Municipal Council, Chairman ni bawk chuan a kaihruaia, Pu V. Malsawmtluanga, Chairman LSDP leh Vice Chairman HPC,Lunglei ni bawk chuan Welcome Speech  sawiin, Lalenkawli Pautu  hnen atangin  "Lalpa min tawngtai tir rawh" tih  malzai ngaihthlak a ni. Rev KV. Thanga, Vice Chairman, LSDP in "Sual thupha chawina leh Ngaihdam dilna" tih thupui a hmangin sermon tawi a sawi  hnuah  Tawngtai rualna neih a ni a, "Ro min rel sak ang che" tih zaihona in 1^st session hi khar a ni a. 2nd Session: hi Upa John C. Lianvunga, EFCI chuan kaihruaiin, “Pathian hnena Lawmthu sawina” tih thupuia hmangin Upa Lalduhthlanga, Vice Chairman, LSDP chuan Pathian thuchah a sawi a,Tawngtai rualna hun hman leh  niin, Lalramchuani Hnamte in mal zai hmangin 2^nd Session hi a khar  a.3rd Session:  hi Pu K.Lalfakzuala, President, YMA Sub-Hqrs., Lunglei chuan kaihruaiin, Rev. Lalzawmliana Varte, Vice Chairman, LSDP chuan “Inhlan tharna/Inpumpekna” tih thupui hmangin pathian thuchah a sawi a, Tawngtai rualna neih leh a ni. Tichuan "Puanvar sinte" tih hla  zaihona neih a ni hnuah,  Rev. H. Killuaia’n a tawp kharna tawngtai hun a hmang ta a ni.

Vawiin State Day-2024 pual Tawngtaina programme-ah hian SAY, Lunglei Corps te chu Zai hruaitu an ni.