3900/2023-2024

Aizawl, 20th February 2024: Mizoram State pian champha phak vawi 37-na chu Mizoram hmun hrang hrangah neih a ni a. He ni pawimawh tak puala official program lian ber chu Vanapa Hall-ah chawhma khan neih a ni. He hunah hian Governor Dr Hari Babu Kambhampati chu khuallian a ni a. Chief Minister Pu Lalduhoma chu Khualzahawm a ni thung.

Mizoram mipui te tana ni chhinchhiah tlak takah hian Governor Dr Hari Babu Kambhampati chuan Zoram dung leh vanga khua leh tui te duhsakna chibai a buk hmasa a. Remmna thuthlung  June 30, 1986 a ziah nih hnuin remna leh muanna awm nghalin State of Mizoram Act 1986 hmangin Mizoram chu state puitlingah hlankai a ni tih a sawi. Mizoram chu state 23-na pek a ni mai lova, a bik taka a inrelbawlna atan India Danpui chhungah Article 371-G siam sak a ni a ti a. Mizoram in state pangai angin February 20, 1987 khan bul a tan tih a sawi bawk.

Governor chuan Mizoram chuan hunrei tak buaina tuar mahse, remna leh muanna thuthlung ziah a nih hnuaah kum 37 lai chu India ramah state ralmuang ber a ni mek tih a sawi a. Mizoramah inthlanpui felfai, muanawm leh thianghlim taka  kan hmachhawn thin te leh House chhungah MLA ten zahawm takin ro an rel thin chu entawn tlak a tih thu a sawi a. India ram hmundangah pawh Mizoram in House a kalpui dan te leh inthlanpui a hmachhawn thin dan te chu chhuang takin a sawi thin tih a sawi.

Remna leh Muanna hi kawng tinrenga hmasawn turin a pawimawh hmasa ber tih a sawi a; a dawtah sawrkar ngelnghet a pawimawh leh a. Heng thil pawimawh te hi Mizoramin a nei ve ve a, hruaitu thar te pawhin theih tawp chhuah an tum nen Mizoram tan beiseina eng a awm mek tih a sawi. Governor chuan Chief Minister in a lo puan tawh 100 Days Program chu chak taka kalpui a nih avangin a phurawm tih a sawi a. Sawrkar thar hnuaia kuthnathawktute chawikanna tumna, kan thil neihsa hmantangkai, sum leh pai renchem a leh a tul lova sum hman tihtawp leh hmalakna dang te chuan hmasawnna kawngah min hruai dawn tih a sawi bawk.

Full Speech of Governor: 

https://dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-celebration-of-mizoram-state-day-2024-at-vanapa-hall-aizawl-on-20th-february-2024

Chief Minister  Pu Lalduhoma chuan chipchiar leh tawi fel takin Mizoram in state a neih theihna kawnga hruaitu hmasa te hmalakna te a sawi a. Article 371-G siam a lo nih dan te, he dan danglam bikna leh a nih phung te chiang taka sawiin Mizoram thil neih hlu ber leh kan himna kulhpui a ni a ti.

State kan nih hma kum 25 khan state dang te chuan kawng tinrengah hmasawnna rahbi an lo tuk tawh a, hmasawnna ruhrel tha tak tak te an lo din tawh  tih a sawi a. Kum 25 chhung hian mumal takin India ram chuan hmasawnna program,  5 - year plan vawi 5 lai a kalpui daih tawh a.  Heng hun hlu tak, hmasawnna program tam tham tak kan hloh  hnuah midang te hnuah bul kan tan vangin kalmuang thiang kan ni tawh lo a.  Midang te umphak tur chuan mi dang te kal aia kal chak a ngai a, midang te aia thawh tam leh thawhrim a ngai zawk tih a sawi. Chief Minister chuan, “Kan ram kalzelna turah  leh kan vision te tihlawhtlin kan tumnaah ke pen sual thiang kan ni tawh lova. Pen khat kalsual pawh a theih tawh loh”, a ti.

Mizoram State Day Celebration 2024  programme hi  Chief Secretary Dr Renu Sharma chuan a kaihruai a. He hunah hian Under Secretary rank leh a chunglam officer zawng zawng sawm vek an ni a. NGO hruaitute leh sawmbik mi thenkhatte  pawh pawh an tel a ni.

Mizoram hi square kilometre 21,087 vel a zau a ni a, hmar lamah India state Assam, Manipur leh Tripura te nen a inri a, khawchhak lamah Myanmar leh khawthlang lamah Bangladesh nen international boundary an intawm a ni. Kum 2011 Census-a a lan danin Mizoram mihring awm zat hi 1,091,014 a ni. Amaherawhchu,  chhut dan hrang hrangin a tarlan ang chuan tuna Mizoram mihring awm zat hi nuai 13 vel ni a ngaih a ni. Mizoram  hian Lok Sabha leh Rajya Sabha-ah seat khat ve ve a nei a. State legislative Assembly ah seat 40 a awm a. Mizoram chhungah hian Autonomous District Council 3 a awm a. Tunah hian Mizoram hi District 11-ah then a ni a, Subdivision 24 leh RD block 28 a awm bawk.