No.3785/2021-2022
Aizawl the 24th, January’ 2022 : Vawiin chawhma khan Agriculture Technology Management Agency (ATMA) Lunglei District buatsaihin Agriculture Conference Hall, Lunglei ah Tomato chin dan inzirtirna leh Tomato chi semna (Training on Tomato Cultivation and Distribution of Seeds) hun hman a ni. Pu Malsawmkima, MAS, District Agriculture Officer, Lunglei District chuan khuallian niin a hmanpui. Farmers Award lawmman hlanna hun hman a ni bawk.

He hun Dr. V. Zodinsanga, Project Director, ATMA, Lunglei District chuan kaihhruaiah Pu Malsawmkima chuan thu sawiin hun harsa tak Covid -19 kara hetiang hun ATMA in an buatsaih hi lawmawm a ti a. ATMA thil tum pawimawh ber chu loneitu ten awmze nei zawka buh leh bal an tharchhuah leh hlawk zawka hralh chhuah dan ngaihtuah sak bakah loneitu te tan training pek, demonstration, exposure visit, Mela buatsaih leh loneitute leh Department mithiam te nena hnathawh dan tur sawihona neih te a ni, a ti a. Tomato ching tura Lunglei District a hmahruaitu ni tura thlanchhuah te chu ATMA-in tomato chi tha kum khata vawi hnih thar thei Arka Samrat a ruahman sak thu sawiin District dang atanga tomato lakluh ngailova intohdelh thei tura tan la tur leh District danga thawn chhuak thei tur khawpa taimakna leh tih tak takna nen tan la theuh turin a chah a. Kuthnathawktute hmasawnna turin Agriculture Department chuan theihtawp a chhuah chhunzawm zel dawn a ni tiin kalkhawmte chu Department ngheng hnai tur leh an mamawhte leh an hriat duhte inthlahrung lova thlen thin turin a chah a ni.

Pu H. Lalthansanga, President MJA, Lunglei pawhin thu sawiin Lunglei District chu District lian ber ah chuan buh leh bal tharchhuah ah a tlem hle a, District dang atanga lo lut hi a tam hle a, theihtawp kan chhuah tlan a tul a ni, a ti a. ATMA in tomato chin kawnga theitawp chhuah tura thlanchhuah an nih angin District hming ti tha tu leh hmasawntu ni theuh turin a chah a. Buh leh bal thar chhuahah Media kaltlanga mi hlawhtlingte pho chhuah a ngaihna ah an inpeih reng thu a sawi bawk.

ATMA hian kum tin Lunglei District chhungah loneitu ti tha an thlang chhuak thin a, chung an thlan chhuah te hnenah Farmers Award Citation leh cheng sing khat an hlan thin a ni. Block pali atanga Farmers Award dawng tura thlan te chu Pu C Lalnunmawia, Serkawn, Lunglei Block, Pu Zosangliana, Thenhlum, Bunghmun Block, Pu Lalengmawia, Cherhlun, Hnahthial Block leh Pu Vanlalnghaka Sailo, Lungsen, Lungsen Block te an ni.

Pi Liansangpuii, DHC (Horticulture Department) leh Pu John Laltluangliana, Deputy Project Director (ATMA) ten tomato chindan training hi an pe a ni.

Attachment

  • Loading attachment...