3900/2024-2025

Lunglei, 2025 Pawlkut thla ni 21: February ni 12, 2025-a Lunglei District-a village council (VC) leh local council (LC) inthlanpui buatsaih tura mawhphurhna hrang hrang chelh tura ruat, nodal officer-te chu vawiin khan District Election Officer Pi Navneet Mann hovin Lunglei DC Conference Hall-ah an ṭhu khawm a. Inthlan felfai leh hlawhtling tak buatsaih a nih theih nana ruahmanna hrang hrang an sawi ho.

Pi Navneet Mann chuan nodal officer-te chu an mawhphurhna ṭheuh ṭha taka hlen chhuah tum tura chahin, duhsakna a hlan a. Election duty neite'n postal ballot hmanga vote an thlak theih dan tur ruahmanna a sawi fiah bawk a. Hemi hnu hian mawhphurhna peng hrang hranga inpuahchahna kalpui dan tur leh thil pawimawh hrang hrang sawi ho zui a ni.

Lunglei District-ah hian VC 88 leh LC 24-ah inthlanpui buatsaih tur niin, a pum puiah general seat 360 leh reserved (hmeichhe tan bika hauh) seat 132, a zavaiin seat 492 a awm a. A pum puiah vote nei mi 92,937 (mipa 45,960 leh hmeichhia 46,977) an awm a ni.

Attachment

  • Loading attachment...