3853/2024-2025

Lunglei, 2025 Pawlkut thla ni 17: February ni 12, 2025 (Nilaini)-a Lunglei District chhunga village council (VC) 88 leh Lunglei Municipal Council (LMC) huam chhunga local council (LC) 24-a inthlanpui buatsaih tura inthlan huaihawt tura ruat Returning Officer (RO)-te tan vawiin khan Lunglei DC Conference Hall-ah training buatsaih a ni.

Chawhma lamah LC inthlan-a Municipal Returning Officer turte tan training buatsaih niin, chawhnu lamah VC inthlana Returning Officer turte tan training buatsaih a ni thung a. Election Officer Pi R. Lalrinzuali'n hun kaihruaiin, VC leh LC inthlan kaihhnawiha hriat tur pawimawh hrang hrang a tar lang a. Master Trainer, Settlement Officer & District Local Administration Officer Pu Beitlotha Nohro chuan inthlan buatsaih dan tur leh vote chhiar dan tur a zirtir a. Ballot paper leh lehkha pawimawh (form) hrang hrang hman dan te a taka zir ho ni bawkin, zawhna leh chhanna leh sawi hona hun hman a ni bawk.

Lunglei District chhunga VC 88-ah general seat 250 leh reserved (hmeichhe tan bika hauh) seat 94, a zavaiin seat 344 a awm a. He'ng VC-ahte hian a pum puiah vote nei mi 51,731 (mipa 26,596 leh hmeichhia 25,135) an awm a ni.

LMC huam chhunga LC 24-ah general seat 110 leh reserved (hmeichhe tan bika hauh) seat 38, a zavaiin seat 148 a awm a. LC-ah hian a pum puiah vote nei mi 41,206 (mipa 19,364 leh hmeichhia 21,842) an awm a ni.

State Election Commission (SEC) aṭanga ruahman lawk dan chuan VC leh LC Inthlanpui 2025-a chuh tumte tan ni 23.01.2025 (Ningani) thleng zing dar 11:00 leh tlai dar 3:00 inkarah RO hnenah hming pek luh theih a ni a. Ni 24.01.2025 (Zirtawpni) zing dar 11:00 aṭangin nomination lutte endik tur niin, ni 27.01.2025 (Thawhṭanni) tlai dar 3:00 thleng inhnuh dawhna hun hawn a ni ang a. February ni 12, 2025 (Nilaini) zing dar 7:00 leh tlai dar 4:00 inkarah ballot paper hmanga vote thlak tur niin, vote thlak zawh fel hnuah zan dar 7:00 aṭangin Returning Officer-te kaihhruainain polling station hmunah ṭheuh vote chhiar chhunzawm a ni ang.