3854/2024-2025
Champhai, 17th January 2025: Champhai District chhunga Village Council 62-a inthlanna buatsaih tura inpuahchahna kal zelah vawiin khan Champhai Bawrhsap, District Election Officer Pu VL Remliana kaihhruaiin sawrkar official, political party leh tlawmngai pawl hruaitute chu DC Conference Hall, Keifangtlangah an ṭhukhawm.
He hunah hian Pu VL Remliana chuan inthlan puan anih aṭangin Model Code of Conduct (MCC) hman ṭan nghal a nih thu a sawi a, MCC hian hna ṭan tawh leh hna zawh tawh hlawh inpek erawh a dal lo a ni, a ti. Champhai Bawrhsap chuan Polling Station tinah Voter-te mamawh ‘Assured Minimum Facilities’ a awm theih nan an chanpual ṭheuh tlin taka thawk turin sawrkar department-te chu a ngen a. Sawrkar hnathawkte chu tumah campaign pui lo tur leh ṭan lam nei a ṭawngkam nei lo turin a hriattir bawk a ni.
Pu VL Remliana chuan Political Party-te chu boruak tichhe zawnga hma la lo turin a ngen a, tlawmngai pawl hruaitute chu inthlanna muanawm leh felfai a awm theih nan thawhpuiah a sawm bawk a ni.
He hunah hian Pu K. Zorammuana, Addl DC; Pu PC Lalṭanpuia, Addl SP leh Pu Nguzaṭhuama, Election Officer te pawhin thu an sawi a. Inthlan muanawm leh felfai tak neih anih theih nan thawhho ṭhat a pawimawh thu te, dan leh thupek kenkawh dan tur te leh inthlan kaihhnawih a hriattur pawimawh hrang hrang te an sawi a ni.
Vawiin ṭhutkhawmah hian Champhai District-a Asst Electoral Registration Officer leh Sector Officer te bakah P&E,PWD, I&PR, DEO, Political Party, MPF, Sub Hqrs YMA, MHIP leh MUP aiawhte an tel a ni.
