DIRECTORATE OF INFORMATION & PUBLIC RELATIONS, Government of Mizoram, India

4829/2024-2025

Lunglei, 2025 Vau thla ni 26: Department of Empowerment for Persons with Disabilities (DEPwD), Ministry of Social Justice & Empowerment (MoSJE) aṭanga ruahman angin National Institute for Locomotor Disabilities – Regional Centre (NILD RC) Aizawl; District Social Welfare & Tribal Affairs Office (DSWTAO), Lunglei leh District Project Office (DPC), Samagra Shiksha, Lunglei te ṭang ho huaihawtin vawiin khan Government High School, Lunglei tualah vohbikte tana intihhlimna kut, “Purple Fair for Persons with Disabilities” buatsaih a ni a. Lunglei High Powered Committee (HPC) Vice Chairman Pu V. Malsawmtluanga chuan khuallian niin hun a hmanpui.

Lunglei HPC Vice Chairman Pu V. Malsawmtluanga chuan Lungleia a vawi khatna atana vohbikte tana Purple Fair buatsaih a ni chu hlu leh lawmawm a tih thu sawiin, a buaipuitute chungah lawm thu a sawi a. India sawrkar leh Mizoram sawrkarin vohbikte hmasawnna a ngai pawimawhin, an tan theih tawpin hma a la tih sawiin, an hmasawnna leh hamṭhatna tur dan ṭha tak tak pawh duan a nih thu a sawi a. Mizoram sawrkar hna lakah pawh vohbikte tan post hauh ṭhin niin, vohbik tam takin mahni kea din nan leh chhungkaw chawm nan an hmang tawh tih sawiin, SCERT chuan kum 1985 aṭangin vohbikte zirna (Education of the Disabled) a kalpui tawh thu leh Mizoram sikul hrang hrangah vohbikte tana ruahmanna siam ṭhin a nih thu a sawi a. Vohbikte chu mi bik, mi dangte aia thil tih theihna bik nei an nih thu sawiin, vohbikte'n khawvel harsatna karah pawh hlimna thuruk an nei tlat chu hlu a tih thu a sawi a. Pathianin anmahnia theihna a dahte hai chhuah leh tihpun zel a nih theih nan Purple Fair chu hlim tak leh hlawk taka hmang turin duhsakna a hlan a ni.

Pu V. Malsawmtluanga chuan vohbikte tana sawrkar hma lakna lawmawm tak tak tar langin, Indira Gandhi National Disability Pension Scheme (IGNDPS) hnuaia vohbikte hnena pension pek ṭhinah Mizoram sawrkarin thla tin ₹ 100 a pek ṭhin chu April 2024 aṭangin ₹ 1,000/-ah tihpun a nih thu leh sawrkar laipuiin thla tin ₹ 300/- a pek nen belh khawmin thla tina an pension hmuh chu ₹ 1,300/- a nih tak thu a sawi a. State Disability Pension Scheme hnuaia Mizoram sawrkarin vohbik zinga chhawmdawl ngai bik, mitdel leh khum bette tana kum khata ₹ 4,200/- chhawmdawlna a pek ṭhin chu kum 2024-25 sawrkar kum thar aṭangin ₹ 6,000/-ah tihpun a nih thu a sawi a. Handicapped Students Stipend hnuaiah kum khatah vohbik zirlai - primary school zirlaite hnenah ₹ 800/-, middle school zirlaite hnenah ₹ 1,000/- leh high school zirlaite hnenah ₹ 2,500/- pek ṭhin a nih thu a sawi a. National Divyangjan Finance and Development Corporation (NDFDC) kal tlanga vohbikte'n loan a pung tlem chi an lak theihna chu Lunglei District-ah pawh kalpui mek a nih thu leh vohbik lehkha thiam, District Employment Office-a inziak lutte tan kum khatah ₹ 7,800/- pek ṭhin a nih thu a sawi bawk.

Lungleia Purple Fair hawnna hun hi Lunglei District Samagra Shiksha DPO Pi K. Lalrintluangi'n a kaihruai a. Baptist Masihi Mission Director Rev. Israel Lalremtluanga'n hunserh hmangin, vohbikte ai awhin Pu Zamuana (TNT Home Lunglei) chuan thu a sawi a. Artificial Limbs Manufacturing Corporation of India (ALIMCO) Pradhan Mantri Divyasha Kendra (PMDK) te'n March ni 18, 2025-a Lungleia assessment camp an buatsaih aṭanga wheelchair, bengdar, mitdel tiang leh hmanraw dangte dawng tur an thlante hnenah hmanraw hrang hrang sem a ni a. NILD RC-Aizawl Officer-in-Charge Pi Sarju Moirangthem chuan lawm thu a sawi bawk.

Purple Fair hawnna hun hman zawh hian vohbikte thil siam chi hrang hrang pho chhuahna leh zawrhna bekte (stall) chu khuallianin a fang kual a. TNT Home Lunglei, Training Centre for Specially Abled Persons Lunglei, ALIMCO PMDK Aizawl leh vohbik mimal pahnih dangin stall hi hawngin, an thil siam chhuah hrang hrangte an phovin an zuar a ni.

Lunglei Purple Fair-ah hian TNT Home Lunglei, Onyx Special School Lunglei, Jehova Nishi School, Play Stop, Training Centre for Specially Abled Persons Lunglei leh hmun hrang hrang aṭangin zirlai leh vohbikte an kal khawm a. cultural programme leh infiamna chi hrang hrang hmanga intihhlimna (sports & games) hun hman zui niin, vohbikte'n an thiam thil chi hrang hrang - zai, changvawn sawi, lam leh thil dangte entirin, infiamna chi hrang hrang - wheelchair hmanga intlansiak, inkut elh, intlansiak, inhrui pawh, disposable cup challenge, chip matching challenge leh blind hit hmang te'n intihhlimna buatsaih a ni bawk.

He hunah hian ALIMCO PMDK te chuan Assistance for Disabled Persons (ADIP) Scheme kal tlangin vohbik mi 22 hnenah leh Rashtriya Vayoshri Yojana (RVY) kal tlangin upa kum 60 chung lam mi 12 hnenah ri hriatna leh chet velna atana an hmanraw mamawh chi hrang hrang - wheelchair, bengdar, mitdel tiang, zakdawh tiang leh hmanraw dangte chu a thlawnin an pe a ni.

Attachment