Vawiin chawhnu khan Lunglei Convention Centre-ah HLSC 2017 Exam-a Lunglei District atanga zirlai titha  pathumte chawimawina hun buatsaih a ni a. School Education Parliamentary Secretary Pu Joseph Lalhimpuia chuan fuihna thu chah in, lawmpuina a hlan nghal a ni. 

Pu Joseph Lalhimpuia chuan zirlai titha te chu an chhuanawm tak zet tiin, an zir zelahnaah pawh inthlahdah lo turin a chah a. Pawl-10 result hi a tawpna a la ni lo tiin, in bul tanna chauh a ni, a ti a. A thiam leh hria apiangte dinchanna a ni tawh a, insawipui in awmzia a nei tawh lo a ni, a ti. Nu leh pa thuawihna te, taimakna leh thawhrimna tello chuan hlawhtlinna a awm theihlo a ni, a ti bawk. 

Parliamentary Secretary chuan Integrated Evaluation Scheme (IES) chungchang chu sawiin, rampumah mark hmuh a tihsan thu leh inkaihhruaina tha tak hnuaia zirlai naupaungte enkawl an nih thu a sawi a. Mark hmuh tlem avanga zirlai naupaungte’n admission hmuh an harsat thin pawh a ziaawm phah a rin thu a sawi a ni. Mizorama kan education system, kan zirlai kal hmang te leh mark pek dan te hi State dang te nena tehkhin pawhin a tha em em a ni, a ti. 

Pu Joseph Lalhimpuia chuan School Education hmalakna thenkhatte tarlangin, Recruitment Rules siam thaa Science leh Mathematics zirtirtu 34 an lak tawh thu sawiin, zirtirtu 111 lak belh tura ruahmanna kalpui mek a nih thu a sawi a . Hostel din tura dan mumal 'Rules and Regulation for Hostels in Mizoram’ an buatsaih thu leh Pre-Board Examination tihtawp a nih tawh thu te tarlang a. Zirlai titha te chu laptop pakhat theuh a pe nghal a ni. 

He hun hi Pu P.C. Lawmzuala, DPC, RMSA chuan a kaihruia a. Holy Faith Principal Pu Lalramhluna Hrahsel chuan an school chanchin tarlangin, Pu R. Laldawngliana, SDEO Lunglei chuan lawmthu sawina inhe lawmpuina hun hi a khar a ni. 

HSLC Exam 2017-ah khan Lunglei District atangin Top-10 ah zirlai naupang pathum an lang a, chungte chu Holy Faith School zirlai naupangte vek an ni.