Vawin chawhnu khan Parliamentary Secretary for Finance, Planning, etc. Pu KS Thanga, Aizawl South-III bialtu MLA chuan Muallungthu Branch YMA Library building, Raja Ram Mohan Roy Library Foundation (RRRLF) atanga sum hmuh hmanga sak chu a hawng.

Pu KS Thanga chuan library chu mihring nunphung kawng engkima kaihruai thei lehkhabu tha dahkhawmna a nih thu sawiin, naupang atanga kum upa lam thlenga mamawh awm na a nih thu a sawi a. Chutiang ang hmun hlu khawtlang tan siam belh a ni chu lawmawm a tih thu sawiin, library tha tak neitu ni satliah mai lova, a chhawr tangkaitu ni theuh turin khawtlang mipuiba chah a ni.

April ni 19, 2016 atang khan RRRLF atanga cheng nuai ruk (6) hmuh hmangin Library hi sak tan a ni a. Feet 24 bial a sak niin, April, 2017 ah khan sak zawh a ni.

Muallungthu Branch YMA hian October ni 18, 1988 ah library nei tanin, kum 1992 ah Mizoram Library Association ah an in affiliated a ni. Library hawnna inkhawm hi Dr. C Lawmzuala, President, Mizoram Library Association leh Pu Lalramliana, State Librarian ten an tawiawm a ni.