No.70/2021-2022

Lunglei, 9th april, 2021: Lungsen, Lunglei District-a vawk hri leng mek a hmunah nimina a enfiah hnuin AH&Vety Minister Dr K Beichhua chuan vawiin chhun khan Lunglei DC Conference Hall-ah meeting kovin hri a darh zau zel lohna tura hmalak dan tur sawrkar official-te, NGO-te leh vawk vulh association hruaitute a sawipui.

Dr George Martin Lalruattluanga, Veterinary Officer Tlabung-in vawiin (09.04.2021) chawhnu dar 1:00 a report a tih chhuahah Lungsena vawk thi tawh zat hi a zavaiin 320 niin vawiin (nimin chawhnu dar 1 atanga vawiin chawhnu dar 1) bika thi chu 44 an ni a. Report hnu hian thih belh engemawzat an awm bawk a ni.

AH&Vety Minister chuan vawk natna hri leng mek chu African Swine Fever (ASF) anih ngei a rinawm thu sawiin he natna hi inkaichhawn awlsam leh hlauhawm tak, a kai tawh za a za thihna thlentu, hri danna (vaccine) leh a enkawlna tur bik damdawi ala awmlo a ni, a ti a. Lungsen mipuite harsatna nasa tak tawh mek chu a tawrhpui takzet thu sawiin he hri hlauhawm tak hi hmun danga a darh zau zel lohna tura theihtawp chhuah tlan hi kan hna pui ber a ni, a ti a. Sawrkarin pawn lam atanga vawk lakluh a khap laia lo la lut ru talh an awm thin chu pawi a tih thu sawiin tuna Lungsen a vawk hri leng mek pawh hi Dan lova ram pawn atanga vawk lak luh ruk vanga thleng nia hriat anih thu AH & Vety Minister chuan a sawi a. Lungsenah Veterinary Officer (VO) post nghal thuai anih theihnan Department in hma an lak nghal tur thu a sawi bawk.

Vawk natna hri hi mihring tana hlauhawm nilo mah se a kai darh tu leh keng darh tu kan nih theih thu AH & Vety Department doctor te chuan meeting ah hian an tarlang a. Hrileng hi Lunglei District chhungah leh hmun dangah a darh zau zel lohna turin fimkhur dan hrang hrang mipuite zawm tur inkaihhruaina Standard Operating Procedure – SOP duang turin AH & Vety Minister chuan District Level Coordination Committee (DLCC) on African Swine Fever and other Trans-boundary Animal Disease (TADS) a hrilh a ni.

Chief Veterinary Officer Tlabung Dr K. Lalhlimpuii chuan The Prevention & Control of Infectious and Contagious Diseases in Animals Act, 2009 Section 20 behchhanin Lungsen khaw pumpui chu April ni 1 (Ningani) atanga thu leh awm hma chu vawk hri lenna hmun (Infected Area) ah a puang tawh a.

Tlabung Civil SDO leh BDO Lungsen ni bawk Pu Lalsanglura pawhin Sec 144 Cr.PC. 1973 in thuneihna a pek angin April ni 2 khan thla hnih chhung awh khapna thupek a chhuah a. Lungsen khua atanga vawk phurchhuah emaw vawk lakluh khap a ni a, vawk thi reng reng paih mai lovin thuk taka phum tur a ni a, vawk damlo reng reng hralh emaw talh khap tlat a ni a, vawk hrisel tha pangai nia hriat talh tur neite chuan Veterinary Officer, Lungsen hnen atangin talh a him thu hriatpuina lehkha an la hmasa ngei tur a ni.

06.04.2021 khan AH&Vety Secretary Pi Lalzarmawii chuan The Prevention & Control of Infectious and Contagious Diseases in Animals Act, 2009 Section 6 behchhanin thuchhuah siamin Lunglei District pum pui (Lungsen tiam lovin) Controlled/Surveillance Zone/ Area-ah a puang a.

Lunglei District Level Coordination Committee (DLCC) on African Swine Fever and other Trans-boundary Animal Disease (TADS) chu an Chairman Lunglei DC Pu Kulothungan A hovin 06.04.2021 chawhnu khan thukhawmin District chhunga hri a darh zel lohna tura hmalak dan tur an rel a. Lungsen khua leh a chhehvel atanga vawk phur ru an awm em tih uluk taka lo check turin Lungsen khaw daia Police check post ah duty dah ni se tih an rel a. Lunglei khawpui thlen hma Sazaikawna Forest Check Gate duty te pawhin vawk tawlh ruk a awm leh awmloh an check a ni. He hrileng kaihhnawiha a tul apianga hma la tur Task Force pahnih din a ni bawk a – Task Force at Infected Zone, Lungsenah leh Task Force at Surveillance Zone Lungleiah din a ni.

Vawk leh ran damlo leh vawk thi rinhlehawm leh vawk tawlh ruk a rang thei ang bera a hnuaia phone number tarlante kaltlanga report turin Lunglei DLCC chuan Lunglei District mipuite a hriattir a ni.

Lunglei District Rapid Response Team