No.71/2021-2022

Dated Serchhip, the 9th April, 2021: Vawiin hian Serchhip District Level Coordination Committee on African Swine Fever and other trans-boundary Animal Diseases te chu an Chairman Pu Lalmuansanga Ralte, MCS, Addl. Deputy Commissioner hovin DC Meeting Hall-ah an thukhawm a, tun laia vawk natna hri leng mek leh a invenna lama hmalak dan turte an sawi ho.

Meeting-ah hian Dr. R. Lalmakthanga, DVO chuan tunlaia Lungsen khuaa vawk natna leh thihna thlen dan report tlangpui sawiin, eng natna nge a nih chiah tih pawh National Institute of High Security Animal Disease, Bhopal lamin an rawn puan theih thuai a beisei awm thu a tarlang a. Tun hnaiah Serchhip District chhung hmun hrang hrangah vawk 13 an thih ve tawh thu leh heng vawk thite hi post mortem a, endik tura Epidemiological Centre, Aizawl a thawn mek an nih thute a tarlang bawk a. Hetianga vawk thi kan district in a neih avang hian awareness campaign pawh khaw pathumah neih zui a ni nghe nghe a ni, a ti.

Meeting hian vawk thi an awm belh zel loh nana awareness tam zawk neih zel tha a ti a. Tin, tuna vawk leh vawksa lam thil lakluh khapna district magistrate thupek awm mek chu khauh taka kalpui ni se a ti a, he hmalakna atan hian AH & Vety Department te, Police te, BSF te, NGO leh VC te nena thawh hona tha zawk neih ni se an ti a ni. District chhunga vulh puitlin vawk leh a sa district chhung veka zawrh kual thuah pawh khaw tina VC leh YMA te hriatpuina lehkha leh a bialtu Vety lama thawktuten vawk hrisel a ni tih lehkha a pek te chauh zawrh chhuah phal ni se tiin a rel a ni. Heng firkhurna dan tlin zo lo leh phal lohva lakluh hriat leh man a awm chuan National Advisory norms anga a rang thei ang bera nuai bo zel ni se tiin a rel bawk.

Serchhip District Level Coordination Committee on African Swine Fever and other trans-boundary Animal Diseases chuan mipuite fimkhurna dan tha taka zawm theuh turin a sawm a ni.