426/2023-2024
LUNGLEI the 7th May, 2024: NH-302 kawng zauh hna thawh mekah Lungsen leh Rangte Village Council te area chhunga ram a paltlang zingah zangnadawmna (compensation) la dawnglo an awm avanga kawngpui laih hna thawh mek chu chawlhsan tir tura hmalak tum a nih thu Land Owners Co-ordination Committee on NH-302, Lungsen & Rangte VC Area, Lungsen te Resolution No.2/2024 dated 05.05.2024 chu hmuh a ni a, Sawrkar Laipui hmalakna pawimawh tak kal mek chawlhtir tumna a awm hi District Administration chuan kan ngai thutak hle a ni.
Land Owners Co-Ordination Committee on NH-302, Lungsen & Rangte VC Area, Lungsen te Resolution No.1/2024 dated 08.04.2024 pawh ni 15.04.2024 khan Competent Authority for Land Acquisition (CALA) leh Addl DC ni bawk chuan ziaka chhangin, NH-302 kawngpui zauh hna kal mekin ram a tihchhiat tawh emaw a tihchhiat tur ram neitu, tun thlenga zangnadawmna la dawnglo te'n a rang thei ang bera zangnadawmna an dawn turte an dawn theihna'na hma a lak dan te a hrilhfiah tawh a. Hetianga hmalakna a kal mek lai leh hmalak dan pawh inhrilhhriat anih hnu lawka Sawrkar hmalakna ti khaihlak zawnga chet lak tumna a awm nghal hi a pawi hle a ni.
NH-302 kawngpui zauh leh siamthat hna kal mek hi he kawngin a paltlang khua te chauh nilo, Lunglei District mipuite nghahhelh em em a ni a, furpui thlen hma-a hnathawhna hun tlemte a la awm chhung hian hna tam thei ang ber thawk turin NHIDCL leh Contractor te pawh nawr mek an ni a. NHIDCL lam pawhin estimate thehluh zawng zawngte chu a rang thei ang bera enfiaha, dikhlel lai te pawh CALA te nena sawiho zung zunga, assessment leh estimate te chu an hotu sang lama thehluh vat an intiam bawk a ni.
Chuvangin, NH 302 kawngpui zauh hna hi chawl lova a kal theihna'n Lungsen leh Rangte VC huamchhungah pawh compensation la dawnglo te ram tih lovah chuan he kawngpui siamthat hna hi chhumlo chat lovin a kal tur a ni a, he kawngpui siamthat hna kal mek tikhaihlak leh tibuai zawnga khawsa an awm a nih chuan an chungah dan angin hma lak a ni ang tih kan inhriattir nghal a ni.
