Vawiin chawhma dar 11:00 khan LGSA Ground, Lungsen-ah Cultural Meet buatsaih a ni a, UD&PA Minister leh bialtu MLA ni bawk Pu Zodintluanga'n Khuallian niin a hmanpui.

Pu Zodintluanga chuan tun hma kan pi leh pu te hun atanga kan lo chin tawh thin, kan culture ni si chin atana tha tawh lo a awm ve a, hengah te hian insiamrem chho zel tur kan ni, a ti a. Culture chu tui luanchhuahna nei lo tling reng ang a nih loh thu sawiin, Culture hi mihring kan changkan leh hmasawn dan mila inthlak danglam hret hret a ni a, pi leh pute tih dan a ni tih vanga mihring dikna chanvo kalha chetna awm thei ang chite chu kan thenfai chhoh hret hret a ngai a ni, a ti. Minister chuan kan culture erawh vawnnun reng a tul tiin kan culture hi kan hnam zia leh ropuina a ral mai loh nan theihtawp chhuaha kan vawnnun a tul a, culture hian hnam inpumkhat nan mi a tuam tha em em a ni, a ti a. Vawiina kan awm leh nun dan pawh hi nakinah chuan kan culture a la nih chhoh zel dawn avangin khawtlang nunhonaah hawihhawm leh inzahtawnna tha tak neia nunze nghet neih a pawimawh thu a sawi bawk.

Khuallian chuan kan culture kaltlang hian kan hnamin hmasang atanga inkhuahkhirhna kan lo neih chhoh zelte 'norms' an tih leh hnamin kan tihphung tura pawm tlan 'customs' kan neihte hmang hian kan inenkawl a ni a. Heng norms leh customs kan hnamin tun hma atanga kan neihte – rimawi, lam dan bik, ei leh in duh zawng leh siam dan bik, incheina, kutthemthiam hmanga kan thil siamte leh kan tawngte hmang hian min hual vel a ni, a ti. Lungsen khuaah ngei pawh Mizote'n culture kan chhawm nun zelna atana Mizo Cultural Organisation (MCO) ten nung leh tha taka hma an la reng chu lawmawm a tih thu a sawi a. Minister chuan thangtharte chu chhawr tangkaia mahni culture vawng nung zel tura chah in, "I lo changkang tak avanga i culture i kalsan a nih chuan nangmah i inphatsan tihna a ni, mi huaisente chuan an culture an kalsan ngai lo," a ti.

Cultural Meet Lungsen khuaa neih hi an khaw chhehvel khua Tlabung YMA, Rolui YCA leh Undermanik YCA te pawhin an hmanpui a. Parlam, Khuallam, Sarlamkai, Cheraw, Chawnglaizawn, Chai leh zaiin hun hman nilen a ni.

Cultural Meet hi Gen Khan Do, Senior Research Officer, Art & Culture Dept. Lungleiin a kaihruai a. Art & Culture Department, Mizo Cultural Organisation General Headquarters, Lunglei leh Joint Committee, Lungsen ten an huaihawt a ni.

Attachment

  • Loading attachment...