Vawiin khan Lawngtlai District Football Association (LDFA) buatsaih Lawngtlai West MLA Cup 2016 chu CYLA khelmualah a kharna hun hman a ni a. Mizoram State Commission for Women Chairperson Pi Vanlalawmpuii Chawngthu MLA chu Khuallian a ni.

Pi Vanlalawmpuii chuan bial chhung infiam mite hmasawn nana football tournament buatsaih chu thil tha tak nia a hriat thu leh hmun dangah pawh chin chhunzawm ve zel tlak nia a hriat thu a sawi a. Infiamna chu hlawhtlinpui turin Mizo thalaite'n theihna sang tak kan nei a, hlawhtling tur erawh chuan zuk leh hmuam leh ruihtheihthila insum a tul a ni, a ti. Mizo hmeichhia sport thei deuhte an 'inti pa' fo mai chu tha a tih loh thu sawiin, Pathian min siam dan anga lan chhuah mai chu a zahawm zawk, a ti a. Rinawmna, taimakna, tumruhna leh chhelna nena hma lam pan zel turin infiam mite chu chahin, Lawngtlai thalaite'n phul lem phah chungah ngei football an khelh ve theih nan hma lakpui a tum thu a sawi bawk.

Lawngtlai West bialtu MLA, AH & Vety Minister Pu C.Ngunlianchunga pawhin tih tak zeta beite tan chuan infiamna chu ei zawnna tlak a nih tawh thu a sawi a. MLA Cup pawh chu bial chhung mite inhmelhriat nan leh inunau nan hman ni se a duh thu a sawi.

Tournament kharnaah hian Lawngtlai East bialtu MLA, Parliamentary Secretary Pu H.Zothangliana, LADC CEM Pu VL Hmuaka, Chairman Pu V.Zirsanga, EM leh MDC eng emaw zat an tel.

Lawngtlai West MLA Cup 2016 hi November ni 16 atang khan khelh tan niin, MDC bial then anga khelh a ni a. MDC bial 9 atangin team 12 an chhuak a. Champion-in trophy, medal leh certificate bakah, Rs 50000/- leh bawngchal an dawng a. Pahnihna hian Rs 50000/- leh medal dawngin, mimal lawmman hrang hrang siam a ni bawk.

Vawiina final hmuhnawm takah hian Paithar Football Club chuan Bungtlang 'S' FC chu 3-2-a hnehin, nomawi an chawi a ni.