Tun hnaiah Lungzarhtum rama Ramsial/Sele ni a hriat awm mek hi chanchinbu leh social media hrang hrangah “Sial pangngai” emaw “Sial thlah” emaw ni anga sawi leh inhnialna a awm mek a. Lungzarhtum rama Sele hi Gaur ho zinga sub-species chi khat Bos gaurus laosiensis (Myanmar leh Laos inkar chauha awm ni a ngaih) ni ngeia lang a ni a. A species dik tak tih chian nan hian a DNA test turin a ek (dung) sample hi Environment Forest and Climate Change (EF&CC) Department in la in ni 24.10.2017 khan College of Veterinary Science & Animal Husbandry (CVS&AH), Selesih-ah leh Mizoram University-ah te pek a ni a, a result hi nghah mek a ni.

A ek sample atang hian a DNA hi duh angin a test theih ngei ang tih a chian loh avang leh a lo theihloh palh thulhah sample dang (thisen, tisa, hmul, chil) la leh turin ruahmanna siam mek a ni a. Chumi ti tur chuan kah mut a ngaih dawn avangin damdawi tul ang angte hmunpui lam atangin chah mek niin reiloteah lo thleng tura beisei a ni. Hetianga thisen (blood sample) atanga DNA endik theih a nih chuan he Ramsial/Sele dinhmun tak hi a hriatchhuah theih dawn a ni.

EF&CC Department, Dr. Senthil Kumar (MZU) leh Dr. Ravindran (CVS&AH) ten hemi chungchang hi ngawrh takin an umzui zel a. He ramsial avanga mipuiin harsatna an tawh mek tihkian nan kawngpui bul fencing leh bawngpui neitupa bawnghnute sawr theilo zangna dawmna pek dan tur pawh EF&CC chuan a buaipui mek a ni.

Ramsial hi Wildlife (Protection) Act 1972 in humhimna sang ber Schedule-I hnuaia a dah angin EF&CC Department chuan a humhalh tlat a ni.