Mizoram Apex Handloom & Handicraft Cooperative Society Ltd. (MAHCO) chuan vawiin khan I&PR Auditorium-ah Annual General Assembly vawi 36-na an hmang a. Khuallian chan changin Parliamentary Secretary (Cooperation) Lt.Col.ZS Zuala’n a hmanpui a ni.
Assembly hawnna thuchah a sawiah Lt.Col.ZS Zuala chuan MAHCO te hnathawh hian Mizoram mai bakah hmarchhak State bial pumpui hi a fanchhuak a ni, a ti a, tunhma deuhva State dang te kutchhuak puantah zemawi leh shawl tha tak tak kan chin uar em em te chu Mizo tualtah kutchhuak chang tlung zawkin a luahlan tawh a ni, a ti a. Ipte chei atanga mobile paina thlenga mawi hnai tak tak an siam chhuak te, thalai duhzawng incheina thawmhnaw mit la tak tak an duangchhuak te bakah hnam nunzia pholang thei pipu atanga puan rotling tak tak an tuai thar leh te hi a chhinchhiah tlak a ni, a ti a. Mizo art leh culture chawimawina kawnga an hnathawh lansarh em em na pakhat chu Guinness World Records a hming chher tuma incheina thawmhnaw zawng zawng kha MAHCO te hnathawh rah a ni, a ti. Parliamentary Secretary chuan MAHCO te chu thang duang zel tura a duhsak thu hlanin an kutchhuak hralhna tur market tha tak a awm a rinpui thu te, tam tham leh man tlawm zawka hralh chhuah theihna tur kawnga tan lak a ngaih thu te bakah an inrelbawlna leh sumpai enkawlna zawng zawngah langtlang thei ang bera kal tum a tul tur thu te a chah a ni.
He huna thusawi tu dang Pu Lalpekliana Registrar, Cooperative Societies pawhin State level Association hrang hrang te hmalakna tlangpui leh tunhnaia All India Cooperative Congress khawmpuia Mizoram Cooperation Minister Pu JH Rothuama, khualzahawm a zuk tawiawm tuma an thurel tlangpui a sawi.
Assembly hi MAHCO Chairman Pi K Lalbiaktluangi’n a kaihruai a. Managing Director Pu R Vanmawia’n kum khat chhunga MAHCO chetvel dan tlangpui a sawi a. Chawhnu session-ah agenda pali chhawpchhuah an sawihova. Chung te chu Audited Balance Sheet 2011-2012 thlirho leh pawm; Provisional Balance Sheet 2012-2013 thlirho leh pawm; Budget 2013-2014 thlirho leh pawm bakah Amendment of Bye-laws tih te a ni.
MAHCO sumdawnna tlangpui chu Handloom leh Handicrafts leh a kaihhnawih thilte an ni bera. An dawrah hian la chi hrang hrang, handicrafts products, loompart & accessories leh handloom products chi hrang hrang te, Traditional Dress leh tual chhuak dang dangte an zuar a. Purda, lukham kawr, bed sheet, bed cover leh item dangah pawh sorkar pawmpui supplier an ni.
