Vawiin khan Registrar Of Cooperative Societies Office Building chuanhnuai berah Mizoram State Agriculture/Horticulture & Marketing Cooperative Federation Ltd. (MAHFED) Sales Emporium thar chu Co-operation Minister Pu J.H.Rothuama'n a hawng a. Hemi zawhah hian Engineers' Club-ah  Co-operative Farmers' Meet a hmanpui nghal a ni.

Sales Emporium thar hawn lawmna leh Farmers' Meet ni bawk inkhawm-ah Minister chuan loneitu leh kuthnathawka thlawhma latute tan MAHFED chuan rahbi thar a chhawpchhuak mek a, an hmalakna avangin khawl hrang hrang hman tangkai kan tum dawn a ni, a ti. Mizote hi khawl tha chakna hmang thiam tak kan nih avangin thangthar zawkte pawhin rim taka kut hna thawh ai chuan khawl hmang tangkaia intodelhna kawng zawh chu an phur zawk a beisei thu a sawi.

Vawiin Farmers' Meet-ah hian Registrar of Cooperative Societies Pu Lalpekliana pawhin thu sawiin MAHFED hmalakna chungah lawmthu a sawi a. Mizoram State pum huap Cooperative/Federation 1073 an awm a, sorkar atanga puihna an hman tangkai leh shareholders te thahnemngaihna avangin heng zinga 810 lai te chuan hlep thahnem tak an thawk chhuak tawh nghe nghe a ni, a ti.

MAHFED Managing Director Pu R.Bhattacharjee chuan an hmalakna langsar zingah MAHFED chu Mizoram puma leitha semdarhtu a nih thu leh loneitute mamawh hrang hrang phuhruk turin Godown/Sale Point 3 lai an neih tawh thu a sawi bawk.

Mizoram State Fruit, Forestry & Vegetable Cooperative Federation Ltd. (MAFF) tia hriat thin tuna MAHFED tih tak hi 23rd May, 1989-a din tan a ni a. A tum ber chu Mizorama huan leh lo nei dan phung (system) thlak a, khawl hmanga chak zawk leh zau zawka hmalak hi a ni. Mizoram intodelh leh changkan theih nan "mechanised farming" tan tak tak tum a ni tawh a, chuvangin MAHFED leh a company zawm Tilak Aakriti Service Company (TAS) te tangkawp chuan Aizawl bakah District tinah Sales Emporium Branch hawngin, lo neihna khawl chi hrang hrang te, thlai chi tha bik te, lei thattna (fertiliser) chi hrang hrang te, hlo leh rannung thahna hlo te pawh zawrh vek an tum a ni.

MAHFED hian kum 2009-2011 chhunga hmalakna leh hlawhtlinna thahnem tak an neih tawh a - Fertiliser Stockist, Tractor Authorised Agent, Slake Lime Agent, Crop Insurance Company Premium Collection Agent, Dealership Certificate of Seeds, MAHFED Sales Emporium, Hlo leh rannung thahna hlo zawrh chhuah, Dealership Certificate of Power Tiller, Cold Storage Godown Sihphir (MAMCO nen Agreement sign fel a ni), Tender engemaw zat chhan hlawhtlin leh Export & Import Licence tihfel te a ni.

Attachment

  • Loading attachment...