Vawiin khan National Voluntary Blood Donation Day, 2014 lawmna hun Association for Voluntary Blood Donation (AVBD), Mizoram State AIDS Control Society (MSACS) leh Aizawl North College buatsaih chu Pu Joseph Lalhimpuia, Parliamentary Secretary chuan khuallian niin a hmanpui.

Khuallian Pu Joseph Lalhimpuia, Parliamentary Secretary chuan thusawiin, Mizo te hi kan Pi leh Pu te atanga thian chhan thih ngam, aia upa te zah mi, tlawmngai thin kan ni a, chu kan nihna dik tak pholang tur chuan kan thalaite in pawimawh hle a, khawvel a kan hnam zia pholang tur chuan keini thalai te hi kan pawimawh tak zet a ni a ti.

A thlawna thisen pek hi khawvel pumpuiah in tihhmuh a in zirtir mek a ni a. WHO chuan kum 2020 hi chuan khawvela thisen inpek zawng zawng hi a thlawna pek atanga hmuh in beiseiin hma an la mek a, tunah hian khawvel ram 60 te chuan a thlawna mi thisen pek ringawt an ring thei tawh bawk a ni. Heng ram 60 te hi ram changkang 35, ram vantlang 18 leh ram rethei ti a sawi 7 te an ni, A thlawna thisen peka intodelh ram 60 zinga ram 6 te hi kum 2004 kha chuan an mamawh 75% pawh a thlawna dawng zo lo an ni. Cook Islang - 40%, Kenya - 53%, Nicaragua - 41%, Turkey - 40%, UAE - 59%, Zambia - 72%. Hetih Iai hian ram 40 zet chuan an thisen mamawh 25% pawh a thlawna mi thisen pek atang hian an la hmu zo lo ve thung a ti bawk. Midangte nunna chhanhim tu leh midangte tana malsawmna nih theihna kawng inhawn pumpelh loh hi a Mizo a, a Kristian bawk, midangte thisen thianghlim pe thei zel turin leh nun uluk turin zirlai te chu a chah bawk.

He programme hi Pu PC Lalhmingthanga, President, AVBD in a kaihruaia, Pu C Lalnunnema, General Secretary, AVBD hnen atangin AVBD chungchang report ngaihthlak a ni a, Dr. Lalmalsawmi Sailo, Project Director, MSACS hnen atangin thusawi ngaihthlak a ni bawk.

National Voluntary Blood Donation hi kum 1964 khan tlawmngaia thisen pe tu (Voluntary Blood Doner) an awm theih nan Chandigarh-ah Blood Bank Society din a ni a. Hemi hnu hian he pawl hmalaknain Chandigarh-ah bawk Indian Society of Blood Transfusion and Immunihaematology (1SBTI) din a ni leh a, ISBTI hi National Voluntary Blood Donation Day (NVBD) atan hman thin a ni. Kum 1996 atang khan India ram pumah NACO hriatpuinain hman tan a ni a, Mizoramah pawh he ni pawimawh tak hi kum tin kan lo hmang ve ta ni.

Programme hi hman zawh a nih hnuah Blood Donation Camp neih zui nghal niin, Aizawl North College te hian thisen pek runpui hi an nei nghal bawk a ni.