Chief Minister Pu Lal Thanhawla ruahmanna anga department tin ten kalphung thar leh hmasawnna atana ruahmanna thar an siamte sawihona kal zelah vawiin khan Chief Minister office cabinet roomah Minister John Rotluangliana enkawl department Food & Civil Supply, Transport leh Tourism te hmachhawp Chief Minister-in a sawipui.

Chief Minister chuan thuhma a sawiah sorkarin mipuite ngainat tur leh nelawm tura a hnathawkte awm tura a beisei angin sorkar hnathawkte chu an hna theuhah tui taka thawk tura a duhthu a sawi a. Officeah staff te chungah thununna discipline vawn anih theihna turin superintendentte chu room hranah thu lova, staff te hmuh theiha thu ve tura a duhthu a sawi bawk a. Hengte bakah sorkar hnathawk pensiona chhuak tur ten sum an hmuh tur a hun taka an hmuh theihna turin, danin a phut angin an pension hma kum hnih la awmah pension process tan tur a ni a, hei hi tam takin an tih thin loh avangin pensiona chhuak ten harsatna an tawk thin a ni a tiin pawi a tih thu a sawi a. Hetiang anih vang hian Service Book te hi account lamah leh establisment lamah pakhat ve ve siam thin nise tha a a hriat thu a sawi a. Mizote hi kristian ni si ringtu kan nihna hi kan hmang rimlo hle a ni tiin, ringtu ni si vantlanga tana hnawksak nih hreh miahlo kan tam hle a ni a ti a. In kan sakah te vantlang ram nek ran chunga sa kan awm thin te hi a vanduaithlak hle a ni a ti.

Food & Civil Supply department hmachhawpte sawihonaah Chief Minister chuan mega block awm tur hi engtianginnge a awm zel dawn kan hriat loh avangin kan inpek hle angai dawn a ni a ti a.Buhfai phurh chungchangah carrying rate chu khauh taka kalpui a tul thu an sawi a. Sawihona dang an neih te chu ei leh bara VIP quota tih tawp chungchangte, APL te tana buhfai kg khata Rs.9.30 a hralh thin chu Rs.15 velah tihsan te, Supply Centre/ Kudam thenkhat tih tawpte, Ration Card computerised vekte leh Sairanga FCI Kudam, LPG Bottling Plant leh Fuel storage siamte an sawiho a ni.

Transport departmnet hmachhawp an sawiho zingah administrative measures a rawtna an siamah expenditure sanction proposal, departmental officers JAG rank chinte te MCS/MSS cadre posta lakluhte leh Transport department driver te tan recruitmen rules hran siam te an sawiho a. Economy measures lamah hnathawh a zira motor inkawl tir leh departmenta driver, handyman, conductor leh mechanic chhawrtlak tawh lohte tana voluntary retirement scheme siam te an sawiho bawk a.Hengte bakah sorkar department motor tena road tax pek ve chungchang leh passenger leh bungrua a tax lak thin hi kum 1989 a siam la hman reng anih avangin tax rate hi ennawna 20% tala tihsan rawtna chungchangte an sawiho bawk a ni.

Minister enkawl department dang pakhat Tourism chungchangah tourist hip thei bik tura ngaih districtah enchhinna pilot project ang deuha distict office hawn chungchang sawiho a ni a, Mizoramah khualzin tam zawk kan hip theihna turin Delhi, Kolkata leh Guwahati ah te Tourist Information Centre siam te, MLPC hman anih hunah thlan bik Tourist Lodge ah te zu zawrh phalna license pek te leh departmenta Tourist Officer post leh Deputy Director post inkara Group A entry grade post awmlo hi siam that nise tihte an sawiho bawk a ni.

Sawihonnah hian Minister Pu John Rotluangliana bakah Parliamentary Secretary Pu T.T.Zothansanga, deparrtment tin Secretary leh official te an tel a ni