Vawiin khan LAD Conference Hall, Mamit-ah Disaster Management & Rehabilitation (DM&R) Department leh Mamit District Disaster Management Authority (DDMA) tangkawpin an buatsaih Sensitization Programme On Risk Reduction for Disaster Management Stakeholders, Ni 1 atanga Ni 4 chhung Week neih tur chu Pi Lalbiaksangi, District Bawrhsap leh DDMA Chairman ni bawk chuan a hawng.

Week hawngtu chuan thu sawiin Disaster Management and Rehabilitation Department in Sensitization Programme an buatsaih chu lawmawm a tih thu a sawi a. Chhiatrupna lo thlen thulha inven dan leh chetlak dan kan ngaihpawimawh a tulzia sawiin tunhma chuan Chhiatrupna thlen thulhah pawh a tuartute tanpuina pek lam ringawt kan buaipui thin a, tunlaiah chuan Chhiatrupna thlen thulha kan lo inven dan tura mithiamte duan chu mipuite pawhin thuawih taka kan zawm a pawimawh thu  sawiin chhiatna hrang hrang a thlen lohna turin lo inveng lawka fimkhur tur leh Week chu hlawkthlak taka hman tum theuh turin kalkhawm te a chah.

Dr. Lalrokima Chenkual, DM&R, Asst. Director (Trg) chu Resource Person niin,  Mizoram chhunga chhiatna hrang hrang thleng thei zingah Lirnghing thlen theihna Zone 5 a awm kan nih angin engtikah nge, engtik hunah nge, engtia nain nge, Khawi hmunah nge, tihte hi tuman sawi lawk theih a ni lova, kan tih theih awmchhun chu kan In sak danah te, kan In sakna hmanraw hman chungchangah te, kan In sakna hmun tur thlan chungchangah te fimkhur a tulzia a sawi a. Invenna kawnga Cheng 1 kan sen hian chhiatrupna lakah Cheng 40 hum ang kan nih avangin inven lawkna kawngah sum leh pai sen ui lo turin kalkhawmte a chah a. Disaster Mangement Response Force te chhiatrupna thlen thulha mipuite'n kan koh eih theihna tur chuan Disaster Management Act 2005 danin a phut angin, khawtlangin an tih theih piahlam a nih thu hrilh hriat tel ngei a ngaih thu a sawi. Kangmei, Lirnghing, Leimin, Leitlahniam, Thlipui etc laka inven dan leh mipui te hmachhawn dan tur chungchangah Power point Presentation neiin kalkhawmte zirtirna a pe. 

Vawiin Week hawnna Programme hi Pu H.Lianzela, Addl.DC Mamit District leh Chief Executive Officer, DDMA ni bawk chuan kaihruaiin DDMA Member te, Sorkar Office a Head of Department te, Khawtlang hruaitute, Tlawmngai pawl hrang hrang YMA, MHIP, MZP atangte leh Govt School leh Private School hrang hranga zirtirtute bakah Mistiri Association atangte in an kalkhawm a ni.