Vawiin khan PWD Engineer-in-Chief (E-in-C) Committee Room ah PWD hotute leh I&PR Department hotute an inkawm a, fur ruahtuiin Mizoram chhung hmun hrang hranga harsatna a thlen chungchang leh mipuite hnena kan hmasawnna ruhrel hrang hrangte awmze nei zawk a zirtirna pek dan tur an sawiho.

Vawiin inkawmhona kaihruaitu Er. R. Vanlaltluanga, E-in-C chuan PWD hnathawh leh hmalakna chi hrang hrang a sawi a, an hnathawhte hi hmasawnna ruhrel tak tak anih avangin inthlahdah hman an nih loh thu leh fur lai phei chuan kawng chhia leh leimin vanga buaina an tawh nasatzia te, theihtawp chhuah tak meuh a mipuite harsatna su kiang tura an thawh thin dan te sawiin indaihlo chung chung pawh a tlaivar leh chaw pawh ei hman lova hna an thawh chang a tam thu a sawi a, PWD a a thawhpui zawng zawngte inpekna leh thahnemngaihna fakawm a tih thin thu  sawitel bawk a ni.

I&PR Director Pi Lalnithangi pawhin PWD in mipuite tana hna an thawh nasatzia chu mi zawng zawngin an hmu a, mipuite nen inpawh tak leh inhrethiam tawn a, inlaichinna tha an nei anih chuan mipuite pawhin neitu thinlung an put bakah hmasawnna hna thawh kawngah pawh chak zawka ke pen a awlsam dawn thu a sawi.

Vawiin inkawmhonaah hian Mizoram hmasawnna tura PWD Department in hna a thawh te, mipuite harsatna su kiang tura hma an lak dan te leh thil pawimawh dang dangah awmze nei zawk leh chak zawka mipuite hnena thu thlen anih dan tur te,  hemi atana hma lak dan tur chi hrang hrang te an sawiho a ni.

Vawiin inkawmhona ah hian Public Works Department aiawhin Pu R. Vanlaltluanga, Engineer-in-Chief, Pu K. Lalsawmvela, Chief Engineer (NH), Pu John Rammawia, Chief Engineer (Roads), Pu Henry Lalmuankima, Chief Engineer (Building), Pu R. Lalrintluanga, Chief Engineer (Planning) an tel a, I&PR Department aiawhin Pi Lalnithangi, Director, Pu David L. Thangliana, Joint Director leh Pi Lallianpuii, Joint Director te an tel a ni.