Vawiin khan DC Conference Hall Mamit-ah Dr. Lalrozama, IAS, District Bawrhsap hovin Mamit khaw chhunga Sorkar Department hrang hrang Heads of Office-te nen karleha Mizoram Governor-in Mamit a rawn tlawh tur lo dawnsawn dan tur chungchang leh COVID - 19 (Novel Coronavirus) laka Mamit District venhim dan bakah Aspirational District hnuaia Mamit District dinhmun thlirletna sawihoin thutkhawm a ni.

Meeting-ah hian P.S. Sreedharan Pillai, Mizoram Governor-in karleha Mamit District rawn tlawh a tum chungchang sawihoin lo dawnsawn dan tur sawiho a ni a. Hemi atana mawhphurhna chanvo hrang hrang inruat nghal niin tun inrinni dt 21/3/2020 hian hnatlang neih tura ruahman a ni.

Meeting-ah hian tunlaia natna hrileng mek Coronavirus chungchang sawiho niin hri laka Mamit District chhung himna tura hmalak mekna te thlirho a ni a. Kan District ramri hrula inkalpawhna hrang hrangte Kanhmun tih loh chu kaltlang theih lova khar vek a ni a. Kanhmun bikah hian Check Post-a Duty-te remtihna leh DC leh SP, Mamit-te remtihna leh phalna neite chauh lo chu tumah luh chhuah phal anih loh thu Meeting-ah hian tarlan a ni a. Kanhmun Bazar ni, kartin thawhlehni a awm thin pawh tihtawp lailawk anih thu tarlan niin hemi avanga ei leh bar zawn kawnga harsatna awm thei lakah mipuite himna tur zawk anih anga hrethiam turin Meeting chuan Mamit District mipuite a ngen nghal bawk. Meeting-ah hian DCSO Mamit chuan buhfai dinhmun tarlangin tun dinhmunah buhfai chhekkhawl a thahnem hrih a, mipuite tan chi-aina tur a awm loh thu tarlan a ni.

Vawiin thutkhawmah hian Aspirational District hnuaia Mamit District dinhmun thlirho a ni a. Tun dinhmunah Aspirational District titha Delta Ranking January 2020-ah 5-na dinhmun kan hauh mek thu leh Agriculture & Water Resources Sector bikah Mamit District chuan 1-na dinhmun kan hauh mek thu tarlan a ni a. Mamit District chuan Composite Score-ah hma kan sawn zel a, December 2019 a 49.8 atangin January 2020-ah chuan 51.4 ah kan chhoh tawh thu tarlan a ni bawk. Hei bakah hian hmasawn kan mamawhna leh tan lak kan ngaihna lai kawng hrang hrangte sawiho nghal a ni.

Vawiin Meeting-ah hian Mamit khawpui chhunga Sorkar Department hrang hrang Heads of Office-te an tel tha hle a ni.