Vawiin khan DC Conference Hall, Mamit-ah Dr. Lalrozama, IAS, Mamit Bawrhsap hovin kan chhehvel State a leng mek Japanese Encephalitis (JE) laka kan District kan him theihna tura hmalak dan tur chungchang ngaihtuaha thutkhawm a ni.

Meeting-ah hian Mizoramah Japanese Encephalitis hi la hmuhchhuah chiah ni lo mahse kan thenawm State-ah he natna vanga nunna chan leh Case tam tak hmuhchhuah anih avangin lo inbuatsaiha lo inralrin dan tur chungchang sawiho a ni a. JE hi natna hrik, zoonotic Virus thosi chi khat Culex putdarh atanga mihringa kai theih anih avangin thosi seh lakah fimkhur a tul thu Meeting-ah hian tarlan a ni a. He natna hrik kaite atanga 100 zela 20-30 te chuan an thihpui zel a. A damchhuaka te pawh rilru lam leh taksa lamah harsatna an neih zui thin avangin he natna lakah hian fimkhur a tul a. A bik takin naupangte'n he natna hrik hi kai an awlsam bik avangin fimkhur a tul lehzual a ni.

Kan ran vulh pakhat Vawk hian thosi atanga he JE hi an kai theih avangin he natna laka kan himna turin kan chenna in atanga hla deuh hlekah Vawk vulh ni thei se tih a ni a. He natna hi a enkawlna tur damdawi a la awm loh avangin leh he natna lak atanga kan him theih nan a hnuaia tarlan hi mipuite'n kan zawm ngei atan committee-ah hian rel a ni bawk.

1. Invenna tura inthuam : Thosi seh laka kan him theih nan thawhnaw thosi seh tlang mai mai theih loha inthuam thin nise..

2. Thosi hlo : Thosi laka kan him theih nan thosi thahna hlo hman uar nise.

3. VC Gram Sabha-ah Medical Staff te'n he natna chungchang hi a tam thei ang ber thehdarha Awareness neih nise.

4. JE chungchang hi Pamphlet hmanga mipuite hnena thehdarh nise, a thehdarh hna hi NSS Volunteer-te'n an thawk ang.

5. Kan District bikah JE natna hrik paia rinhlelh chu Medical Staff-te'n abik taka buaipui leh a enkawlna ruahman tura tih a ni a. Hei bakah hian kan in leh a vela tui tling awm reng rengte thenfai nise tih a ni bawk.

Vawiin Meeting-ah hian District Task Force on Immunization (DTFI) Committee Members-te an tel tha hle a ni.