Vawiin khan DC Conference Hall, Mamit-ah Dr. Lalrozama, District Bawrhsap, District Level Committee On Cleanliness Chairman ni bawk hovin 2nd October - 9th October chhunga Cleanliness Week hman dan tur relin thutkhawm a ni.

Dr. Lalrozama chuan kalkhawmte chungah lawmthu sawiin Mamit District chhung leh Mamit khawpui faina atana mipuite leh tlawmngai pawl hrang hrangte thawhhona chu lawmawm a tih thu a sawi a. Kan hma-a faina hapta kan hman turah theihtawp chhuaha faina kawnga hma kan sawn zelna tura nasa lehzuala tan la leh turin a sawm nghal bawk.

Meeting-ah hian kumina Mamit khawpui chhunga Cleanliness Week hman dan tur rel a ni a. Week chhung hian khawpui chhunga Sorkar Office hrang hrang, Zir In bakah Hotel leh Restaurant hrang hrangte fai leh fai loh endika lawmman siam nise tih a ni a. Higher Secondary School leh College zirlaite tan faina lam hawi hla inphuahsiak leh Essay Writing Competition buatsaih nise ti-a ruahman a ni a. Endiktu tur hrang hrangte Meeting-ah hian ruat nghal an ni bawk.

Week chhung hian Mamit khawpui chhunga Village Council hrang hrangte chu an remchan anga meikhu chhuak hnatlang ko theuh turin Meeting hian a ngen bawk.

Week kharna Ni 9 October, 2019 a neih tur chungchang sawiho nghal niin Chhimveng YMA Hall-ah zing Dar 11:00-ah hman nise tih a ni a. Week kharna hunah hian faina kawnga inelna hrang hrangte lawmman semna neih nghal tura ruahman niin mipui zawng zawngte he huna tel vek tur hian sawm kan ni.

Vawiin Meeting-ah hian District Level Committee On Cleanliness Members-te an tel tha hle a ni.