Vawiin khan Zofisfed-in Fisheries Post Harvest Infrastructure hnuaia Ice Plant Darlak a an bun chu Pu Dr B.D Chakma Fisheries, Sericulture Minister chuan khuallian niin a hawng.

Hawnna inkhawm Pu F. Lalnienga Chairman ZOFISFED kaihhruaiah khuallian Dr B.D Chakma Minister Fisheries chuan Darlak khua leh a chhehvel a Sangha hmanga eizawngtute tana tangkai tak tur vur siamna hawn a ni ta chu lawmawm a tih thu a sawi a, kan sangha tharte a dahthatna kan neih loh avangin Darlak khua a sangha thar chhuak tuten harsatna kan tawk thin a, heng kan harsatna hi tun atang chuan a ziaawm tawh a beisei thu a sawi a, kan sangha thar te pawh man man zawk a hmundanga hral tura kalpui pawh tunah chuan a theih tawh dawn a ni a ti, hei hi hmasawnna ropui tak a ni a ti bawk.

Fisheries Minister chuan Darlak khua leh a chhehvela tuikhuah neia sangha khawi tute chu hei aia nasa leh zuala a sangha thar chhuak tura tan la turin a fuih a, Ram changkang a piangin sangha an ei nasa a, an hrisel bawk a ni a ti a, Vur siamna tha tak mai kan neih hi uluk taka enkawla a chhawr tangkaia mahni ta anga duat taka enkawl theuh turin khaw mipui te a sawm a ni.

Dr O.P Singh Managing Director ZOFISFED chuan Darlak khua a Ice Plant bunna a tan hian 12.5 lakhs senga din a nih thu a sawi a, he Ice Plant ah hian vur 30 qtl vel leng tur a ngaih a nih thu a sawi bawk, Vur tlangkhat hi a mamawh tuten Rs 30(sawm thum) in an lei thin dawn a hei hi kg 15 a rit a ni.

Minister hi Aizawl leh Mamit lam atangin Fisheries Department hotute leh ZOFISFED lama hotu lian ten an tawiawn a ni.