No.914/2021-2022
Mamit 11th June, 2021 : Vawiin khan Aizawl-Mamit-Kawrthah Highway Junction H. Thanzauva Chawlhbuk-ah District Level Committee on Green Mizoram, Mamit District buatsaihin Green Mizoram Day, 2021 Ceremonial Planting Programme hman a ni a. He hun hi Er. H. Lalzirliana, Mamit Bialtu MLA chuan khuallian niin a hmanpui.

Khuallian Er. Lalzirliana, MLA chuan thing phun pawimawh zia sawiin kan tu leh fate tan chenna tlak ram kan hnutchhiah angai a, kan ram chereu tur leh sik leh sa nasa taka danglam tur vennan thingphun uar turin kalkhawmte a chah a, kan thingphun tawhte pawh uluk leh zuala an nun ngei theihnan vil zui turin a chah bawk a ni. Kan khawpui luhka km 3 huam chhungah hi chuan nasa tak in thing phun uar ila, chumi chuan kan khawpui Mamit luhka pawh a cheimawi ngei a beisei thu a sawi. Kawngpui dunga mimal ram neite pawh in kawngpui reserve chhung a Forest Deptt leh pawl hrang hrang thingphunte chu lo enkawl uluk a theih ang ang a lo enkawl a lo vil zui turin a ngen bawk a ni.

Pu PC Lalchhandama, DFO Mamit chuan Report tawi pein Mamit District ah hian Green Mizoram  Day hi kum 1999 aṭang khan hman ṭan  anih thu sawiin nikum 2020 thleng khan thing ṭiak 1,18,193 phun ni tawh in chung zinga 40% (47270)  chu ṭha takin an la nung a ni a ti. Green Mizoram Day 2021 denchhen hian  thing ṭiak hi June ni 4 leh ni 8 khan pekchhuah tawh niin 6727 thing ṭiak pek chhuah tawh a ni a, vawiin leh thawhṭan thleng hian thingphun duh tan Mamit DFO Office ah ngaihven theih anih thu a sawi bawk.

He hunah hian Village Level Fire Prevention Award 2021 puanna khuallian hian nei nghalin lawmman hetiang hian a sem nghal a ni. Pakhatna  Nghalchawm, pahnihna Kawrthah South, pathumna Kanhmun te an ni a. 1 na hian Rs 50,000/- leh Certificate. 2 na hian Rs 30,000/-leh Certificate leh 3 nain Rs 20,000/- leh Certificate an dawng nghal bawk a ni.

Khuallian, Mamit DC, National Awardee, Sub Hqrs YMA, Honorary Wildlife Warden, DIPRO Mamit bakah sawm bik ten thingphunna hun an hmang nghal a. Hei bakah hian DFO Mamit hmalakna in vawiin ni hian thing ṭiak 250 vel phun turin ruahmanna siam a ni bawk a ni.

Kumin Green Mizoram Day thupui hi "Tuihna leh boruak tha siam nan thing I phun ang u" tih a ni a. He hun hi Dr. Lalrozama, IAS, Mamit District Bawrhsap chuan kaihruaiin Covid Appropriate Behavior zawm chungin sawmbik mi tlemte an tel a ni.