No.913/2021-2022

Aizawl, the 11th June 2021: Covid-19 hripui leng laka invenna hmanraw pawimawh tak pakhat Hand Sanitizer chu India ramah a lem (spurious/Sub-Standard) a darh nasa hle tih hriat a ni a. Hemi chungchangah hian mipui te fimkhur tura hriattirna a hnuaia tarlan ang hian Pu Lalsawma, Controlling & Licensing Authority Directorate of Health Services chuan hriattir a siam.

Covid-19 hripui leng laka invenna hmanraw pawimawh tak pakhat Hand Sanitizer chu India ramah a lem (spurious/Sub-Standard) a darh nasa hle tih hriat a ni a. Product tha lo dapchhuah hna hi Mizoram FDA chuan a thawk reng a, hmuhchhuah pawh engemawzat a nei tawh a ni.

Tunhnaiah Hand Sanitizer chikhat, a hming 'Reenee' tih chu Mizoram hmun thenkhatah a darh leh nual tih hriat a ni a.

He Hand Sanitizer (Reenee) hi RBM Herbal Care, Shyam Estate, Changodar District, Ahmedabad, Gujarat siam a ni a. A label siam dan a dik loh bakah, hawrawp ziak sual a awm nual a. Hetiang label fello product zawrh chhuah hi Drugs & Cosmetics Rules, 1945 in a khap tlat a ni.

Gujarat State FDA hnenah thil awmzia hriattir a ni a. Anni lam pawhin rang takin hma an la nghal a. A siamtuten thil dik lo awm chu pawmin, an hralh chhuah tawh koh kir lehna (product recall letter) an chhuah zui nghal a ni.

Chuvangin he Hand Sanitizer (Reenee) kawlte chuan hralh zawm tawh lovin an laknaah an thawnkir leh vek tur a ni.

Hand Sanitizer hi a chi hrang a tam hle a. Tunlaia hri leng (Covid-19) laka inven nan erawh a hman tlak vek lo tih hriat tur a ni. WHO-in Coronavirus laka kut silfai nana Sanitizer a recommend chu 80% Ethyl Alcohol emaw 75% Isopropyl Alcohol emaw pai a ni. Hripui leng kara awm kan nih avangin Hand Sanitizer hman tur thlan chungchangah mitin kan fimkhur a ngai hle.