Vawiin khan Mamit District Thalai Pawl leh Legal Awareness Authority, Mamit hmalaknain Chhimveng YMA Hall, Mamit-ah Moral Reform Programme Cum Awareness Campaign 2017 hman a ni a. Pu John Rotluangliana, Minister, Transport, FC&CA, Tourism leh Mamit bialtu MLA ni bawk chuan khuallian niin a hmanpui. 

Khuallian chuan Mamit District chu hnam hrang hrang chenna a nih avangin rilru zau tak pu chunga hnamdangte chenhopui thiam a pawimawh thu leh Mizo Nationalism chu hnamdang huatna a nih loh thu a sawi a. Hnam mu rei chu an dingchhuak ngai lova chuvangin thalaite chu mut hun leh zing thawh hun hre thar tur leh thawhrimna nen taima taka eng hna pawh thawh hreh nei lo turin kalkhawmte a fuih. Mipuite'n ram hruaitu tha kan duh ang bawkin mipui rinawm leh taima pawh kan ramin a mamawh a ni a ti bawk. 

Khualzahawm Pu H.Lianzela, Addl.DC Mamit District pawhin thu sawiin thalaite'n hun vawndik nachang kan hriat thar a tulzia a sawi a. Midang tlin lohna lai ringawt hmu lian lova an thatna lai hmuhsak thiam turin kan rilru sukthlek kan siamthat a pawimawhzia a sawi bakah roreltute'n dan zawm tur an siam hrang hrangte zawm tha turin thalaite a fuih. 

Pi Gracy L.Bawitlung, MJS, Chief Judicial Magistrate pawhin thu sawiin, tunlaiah thalaite'n Social Media kan intihhmuh nasa tawh hle a, thusawi tura zalenna ( Right to Speech) kan neih hi thil tha lo zawnga hmang lovin zalennain a kentel mawhphurhna leh a khuahkhirhna dan hrang hrang ngaihtuah ran chunga Social Media lama kan thil tarlante fimkhur turin thalai kalkhawmte a chah. IT Act Section 66 A chu Supreme Court in nuaibo mahse IPC Section 499 Defamation hmangin kan thil tarlan chungchangah hrem theih kan ni tho a ni a ti. 

K.Lalthangmawia, President, Mamit District Thalai Pawl pawhin Mamit District Thalai dinchhan leh thalaite fuihna thu sawiin Pu Vanlalhmachhuana, MCS, SDC Mamit chuan Paper Presentation hmangin kalkhawmte zirtirna a pe bawk a ni. 

Programme hi H.Lallawmkima, Vice President, Mamit District Thalai Pawl in kaihruaiin Vanlalfaktluangi, Treasurer, Mamit District Thalai Pawl chuan hunserh a hmang a. Peter Lalmuanzova, Secretary, Mamit District Thalai Pawl chuan kalkhawmte lawmna thu leh  inhmelhriattirna a nei bawk. 

Vawiin Programme-ah hian Mamit khawpui chhunga thalaite bakah khawtlang hruaitute leh Department hrang hranga Officer-te an tel a ni.