205/2022-2023
Mamit 20th April, 2022 : Vawiin khan I&PR Conference Hall, Mamit-ah Samaritan Society of Mizoram leh YRG Care buatsaihin Orphan and Vulnerable Children (OVC) bakah Stakeholders te'n Co-ordination Meeting neih a ni a. HIV dona kawnga chak zawka hmalak dan tur, HIV vei naupangte'n enkawlna tha an dawn theih dan tur hrang hrangte sawiho a ni.

He hun khuallian ni-a hmanpuitu Dr. Zothankhuma Chhakchhuak chuan HIV Programme chu hna hautak tak, thawh zawh awm thei lo leh thawktute inthlahdah theih miah lohna anih avangin a field a thawktute mai bakah mi zawng zawng kan pawimawh thu a sawi a. Kan District chu Border Area kan nih angin HIV kaina chance a san bik thu sawiin District chhunga HIV dona kawnga thawktu zawng zawngte chu theihtawpa kan tanrual a, tun aia zing lehzuala inhmuhkhawm a tul thu a sawi a. OVC chungchang tarlangin naupang HIV vei, enkawlna mamawh tak takte chu a hranpa a khungkhawma enkawl lova, anmahni chenna in a enkawl an nih avangin OVC a thawktute ang chiahin an chenna in a anmahni enkawltute an pawimawh thu a sawi a. HIV chungchanga hriat tur pawimawh awm thei zawng zawngte an hriat ve vek a, hmangaihna leh dawhtheihna nena enkawl tura hrilhhriatna leh zirtirna an neih a tul thu a sawi bakah HIV dona kawngah englai pawha Mamit Health Department te chu an inhawn reng thu a sawi bawk.

He hun kaihruaitu Dr. Zohmingsanga, State Manager, Mizoram OVC chuan OVC chu naupang HIV natna avanga harsatna tawk, an hriselna leh an hma hun atana puitling zawk an nih theih nana enkawl leh chhawmdawl a nih thu sawiin HIV dona kawnga thawktu pawl hrang hrangte chu OVC tawiawm a, thawhpui zel turin a sawm nghal bawk a ni.

He hunah hian Pu John Thansanga, Project Director, Samaritan Society of Mizoram chuan Mamit District chhunga HIV/AIDS dinhmun tlangpui tarlangin ICTC Kum 2003 a kan neih thu a tarlang a. ART Centre 2015 May thla atanga kan neih thu tarlangin Targeted Intervention Kum 2005 atangin Bethany Social Welfare kan neih thu a tarlang a. Tun dinhmunah Targeted Intervention kan District-in 4 kan neih mek thu a sawi bawk.

Dr. Lalrintluangi, ART Centre chuan tun dinhmuna Mamit District ART Centre dinhmun tarlangin ART la mek mi 413 an awm mek a. Heng zingah hian naupang kum 15 hnuailam 11 awmin Orphan and Vulnerable Children (OVC) (Kum 18 hnuailam) mi 7 an awm mek thu a sawi.

He hunah hian DCPU Mamit, RBSK/RKSK leh HIV Positive atangin thusawi ngaihthlak a ni bawk.

Vawiin Co-ordination Meeting-ah hian Mamit District chhunga HIV dona kawnga thawktu hrang hrangte, DCPU, Mamit leh Women and Child Development, Mamit aiawhte an tel a ni.