Vawiin khan CMO Office Kumtluang Hall-ah Mizoram Journalists' Association, Mamit District te leh District TB Centre, Mamit-a thawktute'n Revised National TB Control Programme (RNTCP) chungchanga hmalak dan tur sawihoin Workshop neih a ni a. He Workshop hi Dr. Lalmuanawma Jongte, District TB Officer, Mamit chuan a kaihhruai.

Workshop-ah hian RNTCP Staff te atangin Report hrang hrang ngaihthlak a ni a. Kum 2019 chhungin Mamit District-ah TB vei enkawl mi 37 awm mekin Multi Drug Resistant  TB vei mi 2 an awm thu tarlan a ni a. TB veite ei leh in tih that nan leh intuituah nan thlatin sum pek thin an ni a. Kum 2018 April thla atanga Kum 2019 July thla thleng mi 111 hnenah Rs 239800/- pek chhuah tawh an ni. Damlo TB damdawi tha taka ei zo tawhte hnenah Rs 750/- pek thin an ni. Tun dinhmunah mi 85 hnenah Rs 63750/- Direct Benefit Transfer hmanga sem chhuah tawh a ni a. TB vei enkawltu (treatment supporter) mi 59 hnenah Rs 63000/- pek chhuah tawh a nih thu tarlan a ni bawk.

Vawiin Workshop-ah hian Dr. Lalmuanawma Jongte, District TB Officer, Mamit chuan TB vei zawnchhuahna kawnga an hmalak tawhna hrang hrangte tarlangin Mamit District chhung hmun kilkhawr lai bikah pawh ASHA te puihna hmanga TB vei zawn chhuah thin an nih thu leh ASHA-te pawh a bika lawmman an siamsak thu a sawi a. Mamit District chhunga PHC zawng zawngah TB hrik enna tur Khak test-na dah vek tura ruahmanna siam niin Lab. Technician-te Training pek vek an ni tawh a. TB umbona kawngah theihtawpa hmala turin Medical Officer leh Health Worker-te pawh Awareness pek vek an nih tawh thu a sawi a. Mamit District chhunga Media te chu RNTCP hmalakna tur kawng hrang hrangah theihtawpchhuahpui turin a sawm a ni.

He Workshop-ah hian RNTCP chungchanga hmalak dan tur kawng hrang hrang sawihona neih a ni bawk.