3904/2023-2024

Mamit 20th February, 2024 : Mizoram chhung hmundangte rualin vawiin khan Mizoram State Day chu DC Conference Hall-ah Pu V.L Remliana, District Bawthsap kaihruaina-in Sawrkar Officials leh tlawmngaipawl aiawhte nen hman a ni a.

Pu V.L Remliana chuan inlawmna thusawiin Mizoramin remna leh muanna kan neih theih nana ngaihtuahna tha leh tui sengtu zawng zawng kan mi hmasate zahna chibai bukin, State puitling kan nih angin kawng engkimah puitling zia kan put a tul a, mahni intodelh a, remna leh muanna kan neih chu chhawm nung zel turin kalkhawmte a sawm a. State puitling nia kan chanvo leh mawhphurhna hlen kawngah a hlutna te hre reng chunga sawrkar hnathawkte, tlawmngaipawl aiawhte pawhin kan theihna zawn theuhah tan kan lak thar a tul a ni tiin, ram leh khawtlang tana inpekna thar nena hmalam pan zel turin a sawm a ni.

He hunah hian Pu K. Vanlalnghaka, Associate Professor, Gov't Mamit College chuan Mizoram State Day chungchangah a lem nen a tarlang a. Pu Vanlalchhuanga Chhangte, President, Sub Hqrs YMA pawhin thusawina neiin Pi Carolyn L.B Khiangte, SDO (Sadar)-in lawmthusawina a nei bawk.