No.2104/2021-2022

Aizawl the 3rd September, 2021 : Vawiin khan PHED, Mamit WATSAN Division hmalaknain PHED Complex, Field veng, Mamit-ah Tui Bill Online Payment hawnna hun buatsaih a ni a. Dr. Lalrozama, IAS, Mamit District Bawrhsap chuan Khuallian niin Tui Bill Online Payment hi a hawng.

Dr. Lalrozama chuan thu sawiin mahni in lum atanga tui bill online hmanga pek theih ani tur chu lawmawm atih thu sawiin, a buaipuitu PHED Department Mamit WATSAN Division chungah lawmthu a sawi a. Mamit khawpui chhung bakah Dampui leh Rawpuichhip khuate tan samkhaina thlentu anih dawn bakah hmasawnna pawimawh tak anih avangin he online payment hi mipuite'n hmang tangkai ngei turin duhsakna a hlan a. Online payment chu tunlai kan covid hrileng nen pawh thil inhmeh tak anih thu sawiin he hri laka kan fihlim theihna kawngah pawh min puih ngei a rin thu a sawi. Kan tha leh hunte productive thei ang bera kan hman theih nan he hmasawnna kawngah hian ke pen theuh turin kalkhawmte a sawm bawk a ni.

He online payment hmang thei tur khaw pathumah hian House Water Connection Mamit-ah 1557, Dampui-ah Connection- 50 leh Rawpuichhip-ah Connection-89, a vaiin 1696 te'n he Online payment system hi an chhawr tangkai thei dawn a ni.

He Online Payment System hi website phedmizoram.in/billpayment.php ah lutin a pek theih a, chubakah mobile payment apps hrang hrang G-pay, Paytm, SBI-YONO, BHIM leh adt. hmangin tui bill hi a pek theih dawn a ni.

A chunga tarlan website hmanga tui bill pek anih chuan RBI dan hmangin tlem a zawng user charge /fee chawi angai dawn a, mobile payment app atanga pek anih erawh chuan user charge/user fee pek angailo thung.

Online payment hi Consumer Number Tui Bill kan dawna a lan ang khan chhutluh mai tur a ni. Consumer No. hi DO08MN atangin a intan anga, atawp lamah number digit 4 a awm bawk ang.

Tui Bill hi Online a pe theilo tan Bill Counter-ah a la pek theih reng bawk dawn a ni.

Er. V. Laldanmawia,SDO PHED Mamit chuan Power point presentation hmangin Tui Bill Online Payment chungchang leh a hman dantur tlangpui sawifiahna hun a nei a ni.

Vawiin hun hi Er.Lalzawmliana, Sr. EE PHED Mamit WATSAN Division chuan kaihruaiin F.Lalengtluanga, A.O, PHED Mamit WATSAN Division chuan lawmthu sawina hun neiin he hawnna programme hi khar a ni.