No.2103/2021-2022

Aizawl, the 3rd September, 2021: Fisheries Department, Champhai District chuan DFDO Pu Lalhmunsanga hovin nimin khan Champhai Tlangsam kaiah Champhai Town Area huam chhunga Sangha khawitute hnenah Socio-Economic Development Policy (SEDP) kaltlangin Sangha chi 44,466 (Singli sangli zali sawmruk paruk) an sem chhuak.

Sangha chi sem chhuahte hi Indian Major Carp (IMC) leh Exotic Major Carp (Grass Carp & Common Carp) te an ni a. Sangha chi hi Sangha khawitute hnenah man tlawm zawk 70% subsidy a pek niin, pakhat hi cheng khat leh duli (Rs 1.50/-) zela pek chhuah a ni. He hunah hian Fisheries Department leh Champhai District Fish Farmers Association hruaitute hmalaknain Sangha chi that leh that loh enfiah hmasak phawt a ni a, a tha tawk a ni tih finfiah hnuah Sangha khawitute hnenah hian semchhuah a ni. Fish Farmers Association hruaitute leh Sangha khawitute hnen atangin Sangha chi sem hi a that thu dawn a ni.

District Fisheries Development Office, Champhai chuan SEDP atangin Sangha chi sem chhuah tur Champhai District tan nuai nga (5,00,000) leh Khawzawl District tan nuai hnih (2,00,000) a dawng a, Covid-19 hrileng avangin vawi khata sem zawh vek theih a nih loh avangin Sawrkar inkaihhruaina duan ngaipawimawh chunga kalpui niin, group hrang hrangah thenin a tahtawla sem tura ruahmanna siam a ni a, tun thla chhung hian sem zawh hman beisei a ni.