No.3560/2020-2020 

Mamit 29th July, 2020 : Vawiin khan DC Conference Hall, Mamit-ah Dr. Lalrozama, IAS, District Election Officer/ District Bawrhsap chuan Mamit District Village Council 2020, Final Electoral Rolls chu a tlangzarh.

Mamit District VC Electoral Rolls tlangzarh takah hian Vote nei mipa 33449 leh hmeichhia 32392, an vaiin 65841 awm mekin In 21244 a awm mek a ni.

Kum 2015 VC inthlanah khan Mamit District chhungah Village Council 88 a awm a. Kumin 2020 VC inthlanah erawh Phuldungsei - Zampui VC leh Lianbuang khuaah te VC thar kan neih belh dawn bakah Chhippui VC chu Chhippui I leh Chhippui II-ah then a ni bawk a. Hei vang hian VC thar pathum kan neih belh ta a. Hetih lai hian Lengpui khua chu Aizawl District-a a beh tak avangin Mamit District chhungah Village Council 90 kan nei dawn ta a ni. Hei bakah hian anmahni khuaa VC la nei velo, an khaw thenawm khaw lian zawk VC hnuaia awm, Sub Village 11 a awm bawk a ni.

Electoral Rolls tlangzarh takah hian Form 3 (addition and transfer) - 1593, Form 4 (deletion) - 866 leh Form 5 (Modification/Correction) - 1534 te siamthat a ni.

Kum 2015 VC inthlan khan Mamit District VC Electoral Rolls-ah Voters 51159 awmin tun tuma VC Roll-ah hian Voters 65841 an awm a. Voters punna zat hi 14682 niin 28.70% a ni. Voters zingah hian Tripura Transit Camp-a awm mek Bru Voters 8974 chu an awmna hlui VC theuhah chhiar tel a ni bawk.

Final Electoral Rolls tlangzarhna-ah hian ERO, AERO, Sub.Hqrs YMA President leh thutharthehdarhtute an tel a. VC Electoral Rolls tlangzarh tak Copy hi BJP, INC leh MNF Party hruaitute hnenah hlan nghal an ni.