Ramchhung hmun dangte rualin vawiin khan PHED Mamit WATSAN Division leh Sub Hqrs YMA, Mamit huaihawtin Observation of World Water Day, 2019 chu I&PR Conference Hall, Mamit-ah hman a ni a, Pu Lalnunsanga Khawlhring Divisional Forest Officer, Mamit chuan khuallian niin he hun hi a hmanpui.

Pu Lalnunsanga chuan mihring piang chhuak tawh phawtin a tellova kan awm theihloh chu tui hi a ni a, Kan Pathian thu-a kan hmuh angin kan nunna chu chhang chauh nilovin tui hi a ni a ti. Chutiang taka pawimawh leh kan mamawh tui chu mitinte hian kan hmu tha em? tih chu kan ngaihtuah tlan a tul hle a, Khawvela cheng mihring 80% hian kan mamawh tawk tui kan hmu lova, Zirna School hniam ber Primary School ah hmun 4 a thena hmun 1 te hian tui thianghlim duhkhawp kan hmu lo bawk a ni tiin nitin tui thianghlim hmuh loh vangin naupang 700 te chu khawvelah an thi a ni a ti.

Tui thianghlim hnianghnar nei tur chuan kan lui tui, leh tuihna kanglo tur tuikhur te kan humhalh that a pawimawh hle a, kan ramngaw te kan vah chereu zel chuan kan tuihna te hi a kangchat mai dawn a ni ti. Mamit District chhung-a Forest Division hrang hrangah tuikhur 106 te chu survey neih mek  anih thu a tarlang bawk.

Kan tu leh fate tana chen zui zelna tlak ram siam turin Mitinte leh Sawrkar Department hrang hrangte chu tuihna humhalhna kawnga tan kan lak a tul takzet thu a lem nen a tarlangin thawhho puiah a sawm a ni.

He hun hi Pu K. Lalthanzama, Vice President Sub Hqra YMA chuan a kaihruai a, Er Lalzuala, SDO Mamit pawhin World Water Day hman a nih chhan leh tuihna humhalhna tura hmalakna tur hrang hrangte a lem nen a tarlang bawk.

Pi Laltharzeli, Ambassador, SBM(G) Mamit District pawhin mitin mamawh tui thianghlim hninghnar taka kan neih theihna turin kan zavaia tan kan lak thu a sawi a, chutiang a nih loh chuan nakin lawkah chuan tui 1 bottle khat hi Rs 100 a kan lei mai a la ngaih rin thu a sawi a, kan tuihnarah tuihna kanglo turin changel phun uar tur leh bawlhlawh kan paih danah te fimkhur turin kalkhawmte a sawm bawk a ni. Pu Vanlalchhunga Chhangte, Secretary Sub Hqrs YMA chuan lawmthu sawina a nei bawk.

He hunah hian Mamit khawpui chhunga Sawrkar Department aiawh, Tlawmngai pawl hrang hrang aiawhte leh Khawtlang hruaitute an tel a ni.