Vawiin khan I&PR Conference Hall, Mamit-ah Zirlaite Ni hman a ni a. He hun hi Pi Lalnunthari, District Education Officer, Mamit chuan khuallian niin a hmanpui.

Khuallian Pi Lalnunthari, District Education Officer, Mamit chuan kan District siamtha turin keimahni theuh kan pawimawh a, zirlaiin a zirlaiah, zirtirtuin a zirtirna kawngah thahnemngai lehzuala tan kan lak a pawimawh thu leh zirlaite hi nakina kan khawtlang nu leh pa tur an nih avangin tun atanga nasa lehzuala tan la turin a sawm a. Human Resource Development lamah tan kan lak a ngai a, tumruhna leh taihmakna nen Pathian tih tlat chunga nasa taka zir turin zirlaite a chah.

Khualzahawm Pu PC Lalthanzuala, President, MJA Mamit District pawhin thu sawiin MZP hian zirlaite tan thi leh thau pawlhin nasa takin a bei thin a. Mizoramin remna leh muanna a neihna turah pawh nasa taka beitu chu MZP anih thu a sawi. Zirlaite fuihna thu sawiin zirlai hrisel kan nih theih nan zuk leh hmuam leh ruihhlo laka kan fihlim a pawimawhzia leh hmalam thlirna eng tak neih a pawimawhzia a sawi bawk.

Lalropuia, President, MZP Headquarters Mamit pawhin thuawina a nei a, Mamit-in Science leh Commerce zirna kan mamawhzia sawiin hemi kawnga hmalakna tur kawng hrang hrangah zirlaite leh zirtirtute chu tawiawm tlat turin a sawm a. Kan ram leh hnam dinchhuahna turin kan tanrual a pawimawh thu leh Mizoram leh hnam tan Mizo Zirlai Pawl-a intat lut deuh deuh turin zirlai kalkhawmte a sawm a ni.

Zirlaite Ni-ah hian Dr.Nancy Lalnunmawii, District Tobacco Control Program (DTCP) chuan zuk leh hmuamin zirlaite a nghawng pawi theihzia zirtirna a pe bawk. He hun hi Christopher Lalmuankima, Vice President, MZP HQRS Mamit chuan kaihruaiin VL.Pekhlua, Secretary, Information & Publicity chuan MZP Mamit chanchin tlangpui report a pe bawk.

He hunah hian Gov't Mamit College zirlai, Diet Training Union, Mamit bakah Zirtirtu thahnem tak an kal khawm a ni.