Mamit hmalakna hnuaiah khawpui chhung faina kawnga hmala tur Mamit Chhimveng leh New Mamit huam chhungah Children Sanitation Club din thar chu Pu C. Sawihlira District Urban Development Officer (DUDO) chuan khuhhawnna a nei.

Pu C. Sawihlira chuan India leh Mizoram Sawrkar chuan  ami chengte hriselna chu a ngaih pawimawh niin kan hrisel theihna turin faina kawngah nasa taka hmalakna kalpui a ni a. Naupang zawkte thinlungah fai tura hmalak duhna a awm chho zel chu lawmawm a tih thu sawiin, naupangte chu kan nu leh pa rual u zawk te'n faina hlutzia an lo hre tawk lo,  a nih pawhin faina kawnga midangte tihhmuhtu ni tum theuh turin a chah a ni.

UD&PA kaltlangin khawpui chhung faina kawnga inelna buatsaih thin a ni a, Kan hmalawka Faina Hapta kan hman leh turah pawh inelna tur tehfung hrang hrang duan a nih tawh thu a sawi. Mamit khawpui leh District chhung khaw hrang hrangte kan lo faia, kan lo hrisel zel theihnan Children Sanitation Club kaltlanga hmalakna chu thlawp thiam tur leh he mi kawnga hmalakna-ah te luangrual taka thawk tlang turin kalkhawm mipuite a sawm bawk a ni.

Pi Laltharzeli, President, Bazar Veng MHIP pawhin thusawiin faina kawnga hmala tura ke a pen kawngah a inchhir awmlohzia hmu chho zelin, a hlawkna hmuh chhoh zel a ni a. PHED leh UD&PA kaltlangin Mamit District chhungah Children Sanitation Club 80( Sawmriat) dawn din a nih tawh thu a sawi, chu chuan rahtha chhuahzelin, fai tura hmalak chu tu tan pawha tihtheih a ni a. Mamit khawpui leh District chhung khaw hrang hrangte kan lo changkan zual zel theihnan faina kawnga pheikhai rual taka ke pen tlang turin kalkhawmte a sawm a ni.

Chhimveng leh New Mamit huam chhunga Children Sanitation Club dinna GSA Playground-a neih hi Pu Lalrindika Sailo, President, Chhimveng V/C chuan kaihruaiin, MUP lam a tanga thusawi ngaihthlak a ni a, Pu Lallungmuana Sailo, Vice President New Mamit V/C chuan lawmthu sawina a nei bawk.

Tukina din thar tak Children Sanitation Club te hian Mamit GSA Playground chhung leh a chhehvel bawlhlawh thianfai nghalin Fai tura thutiamna an nei nghal a. He hunah hian Naupang kum 15 hnuailam mi 350 vel leh nu leh pa, khawthlang hruaitute leh Tlawmngai pawl aiawhte an tel a ni.