Nimin khan Mamit District huamchhunga MLA Constituency pathum 1-Hachhek AC (ST), 2- Dampa AC (ST) leh 3- Mamit AC (ST)-ah te boruak muanawm tak hnuaiah inthlan zawhfel a ni.

1- Hachhek AC (ST)-ah hian Polling Station 43 awmin vote awm zawng zawng atanga chhutin 78% a tla a. 2- Dampa AC (ST) huamchhungah hian Polling Station 37 awmin vote awm zawng zawng atanga chhutin 84% a tla bawk. 3- Mamit AC (ST) huamchhungah hian Polling Station 45 awmah 81% vote a tla bawk a ni. A pumpuia Mamit District MLA Constituency pathum dinhmun khaikhawm chu mipa vote nei zawng zawng 33307-ah 26656-in vote thlakin 80% a ni a. Hmeichhia vote nei zawng zawng 32224-ah 26179 in vote thlakin 81% a ni. A pumpuia Mamit District chhunga vote tla dinhmun Pollstar-a a lan dan chu 81% a ni.

Tunah hian Polling Station hrang hrang atangin Polling Officials te'n EVM leh VVPAT-te Returning Officer hnena in-report tur leh Strong Room-a him taka dah turin Mamit DC Complex an pan khawm mek a. Mamit khaw hnaih deuh Polling Station-a duty-te chu zan dar 6 vel atangin an rawn thleng tan tawh a. Polling Station hmun hla zawkte pawh Mamit lam panin an rawn tlan mek hlawm a  ni.