Election Commission of India (ECI) thupek angin kumin Ni 1-31, 2017 inkarah hian India khua leh tui kum 18-21 inkar Electoral Roll-a hming chuang lote tan Electoral Roll-a inthun runpui neih a ni dawn a. Mizoram hmun dang rualin Mamit District-ah pawh he Special Drive hi neih tura ruahman a ni. 

District Election Office, Mamit chuan hmalak dan tur rel turin Electoral Roll buaipuitu ERO, AERO leh BLO te Meeting chu Ni 6 June, 2017 hian koh a ni a. Special Drive a hlawhtlin theih nan hian Political Parties leh NGO te thawhpuia sawm niin Ni 2 June, 2017 hian Meeting neih a ni dawn bawk a ni. 

Special Drive hun chhung hian kum 18-21 inkar Electoral Roll-a la chuang ve lote chuan BLO kaltlangin Form -6 hmangin Roll a inthun dilna an thehlut thei ang a, BLO te hian an bial theuhah In tin tlawhchhuakin Kum 18-21 inkar Roll a inthun duhte an khawn khawm dawn a ni. Heng Form-6 BLO ten an khawn khawm hi anmahni bialtu theuh ERO/AERO te hnenah an thehlut ve leh thung ang. 

Ni 8 July, 2017 leh Ni 22 July, 2017 hian Polling Station tinah Special Campaign neih a ni dawn bawk a, hemi ni hian Kum 18-21 inkar ten Polling Station a an lak theih turin Form-6 chhawpchhuah a ni dawn a, dilna chu BLO hnenah thehluh nghal theih a ni ang. 

Zirna In (High School leh a chunglam) hrang hrangah ERO/AERO ten Special Drive chungchang inhrilhhriatna an kalpui theih nan ruahmanna siam a ni bawk ang. 

Special Drive hun chhung hian Electoral Roll-a inthun thar bakah mitthi tawh Electoral Roll-a la chuang reng te hming paih (delete) hna kalpui a ni tel dawn a. Hemi atan hian bialtu BLO ten Registrar of Births & Deaths atangin mitthi tawhte list an khawnkhawm ang a, Electoral Roll atangin paih a ni ang. 

Vawiin khan Special Drive a lo hlawhtlin theih nan District Election Officer, Mamit chuan DIPRO phungbawmnain Mamit-a thu thar thehdarhtute hnenah Special Drive Programme puanzarna an nei a ni.