No.4483/2020-2021

Mamit 27th August, 2020 : Mamit District chhungah 20th General Election to Village Council, 2020 chu tukin Dar 7 atang khan boruak muanawm tak hnuaiah tluang taka kalpui a ni a. Darlak Village Council bikah erawh engemaw harsatna chinfel ngai an neihte chinfelsak an nih hnuin zing dar 9-ah inthlanna hi kalpui a ni thung a ni.

Vawiin chhun dar 12 thleng khan vote tla zat hi 28.6% a ni.

Tarlan tawh angin Mamit District chhungah hian Village Council 90-ah Vote thlakna kalpui a ni a. Sub Village 11-te erawh Village Council 90-ah hian behtir an ni. Mamit District chhungah VC Election-ah hian Voters 65841 awmin hetah hian Tripura Transit Camp-a Bru Voters 8987 leh uncontested khaw panga awmna Voters 1575 a awm avangin voters turn-up percentage hi 33.66% anga ngaih theih a ni a. Uncontested khaw panga voters 1575 chhiar tel lovin voters turn-up percentage hi 32.7% a ni thung.Tripura Transit Camp-a awm mek Mizoram chhunga vote neite hi tunlai hrileng avanga quarantine hun chhung ni 14 thleng khunghran tawh an awm loh avangin State Election Commission thu angin tun tum VC Election-ah hian vote an thlak thei lo a ni.

Mamit District chhunga Polling Station tinah hian State Election Commission thu angin, tunlai hrileng avangin vote thlakna hmunah hian Mask, Social Distancing leh Hand Sanitizer-te a theih ang anga tha a kalpui a ni a. Pen inhmantawm lovin mahni hman tur theuh intumtir an ni bawk.