Vawiin khan DC Conference Hall, Mamit ah Pi Lalbiaksangi District Bawrhsap, District Level Task Force ( Tobacco Control) leh Anti Tobacco Squad (ATS) Chairman ni bawk hovin Mamit District chhunga Vaihlo hluar zel tur laka inven dan tur chungchang sawiho a ni.

Meeting-ah hian kum 2016-2017 chhunga hlawhtlinnate tarlan a ni a. Squad Drive vawi 55 neih niin dan bawhchhiate atangin cheng 4040 hmuh a ni a. Heng Pawisa te hi Treasury Office Mamitah Govt Revenue Head-a chhun luh vek a nih thu tarlan a ni.

Kum 2016-2017 chhung vek hian COTPA kaihhnawiha training vawi 12 neih a ni a. Awareness Campaign School 40 ah neih a ni bawk. Mamit khawpui chhunga School 4 te chu Tobacco free school a puan niin, chungte chu Govt Agape Middle School, Luangpawl, Govt Middle School I, Charkawn, Govt Middle School II, Field veng bakah Govt Middle School III, Dinthar te an ni. Meeting-ah hian kumina World No Tobacco Day, May 31 a hman dan tur rel nghal a ni a.

World No Tobacco Day thupui (theme) tur hi “Vaihlo hi hmasawnna tibawrhbangtu a ni” tih a ni dawn a ni. Kan District chhunga Model Village Kanhmun, Dapchhuah leh Reiek khuate chu Tobacco Free Village a puan a nih theih nan hmalak dan tur hrang hrangte sawiho a ni bawk. Vaihlo leh a kaihhnawih, ramdang leh tualchhuang ami eng chi pawh, Health Warning nei lo te chu man a, tiral zel tura hmalak dan tur sawiho a ni bawk.

Vawiin thutkhawmah hian District Level Task Force (Tobacco Control) Committee Member te leh Anti Tobacco Squad (ATS) Member te an tel tha hle a ni.