1592/2023-2024

21.08.2023: Public Works Department chuan a hnuai ami ang hian Mamit Truck Owners’ Association ten NH-44A bandh neih an tum chungchangah a hnuai ami ang hian thuchhuah an siam:

NH-44A highway-a harsatna hrang hrang thleng thin Mamit Truck Owners Association ten an sawi hi Mizoram PWD chuan pawi a ti tak zet a. He highway siamtu contractor Gayatri Project Ltd. chuan sum harsatna an tawh avangin duh angin hna an thawk chhunzawm hlei thei lo va. He kawng chunga thuneitu Ministry (MoRTH) lam pawhin an contract titawp turin tunhnaiah Mizoram PWD a rawn hriattir a. An contract titawpa hna balance work re-tender tura hmalak mêk a ni.

Tunlaia Mamit Truck Owners Association te’n an thuchhuaha harsatna hrang hrang an sawi thil awm dan chu hetiang hi a ni e:-

1) Darlak leh Bawngva inkara Bailey Bridge: He lai hmuna Bailey Bridge hman mek hi a hlui tawh a, motor lian full load tan zawh ngam a nih loh avangin load restriction siamin a zawh tawk 12 MT chin tan zawh phal a ni a. He bridge hi siam tha tura hmalak mek a ni. Amaherawhchu, bailey bridge siam tha tur hian bridge awm sa hi nawr chhuaha remkhawm that leh tur a ni a. Hei vang hian bridge siamthat chhûnga motor tlanna tur kawng diversion neih a ngai a. Thâl lai lui tui  tlèm laia motorin lui a daikai thinna lai hi motorin a dai kai theih leh hun fur zawha Bailey bridge siam tha tur hian hmalak mek a ni.

2) National Highway Darlak to Tuidam siam that: A chunga tar lan angin tuna contract hna kal lai hi tihtawpa a hna hi a thawk chak thei tur contractor dang thlang tura re-tender turin hma lak mek a ni a. Tun dinhmuna a chhe zual siam tha tur hian ruahmanna siam mêk a ni a, hma lak tan thuai a ni ang.

3) Darlak leh Bawngva inkar Teirei Luia RCC Bridge chak zawka thawh: He RCC bridge pawh hi a chunga tar lan NH-44A contractor hnuaia thawh a ni a. A chunga tar lan tawh angin tuna contract hna kal lai hi tihtawpa a hna hi a thawk chak thei tur contractor dang thlang tura re-tender turin hma lak mek a ni.

4) Tuidam Existing road-a LMV chung lam kal phalsak: Tuidam existing road hi kawng chhe zual lai hmun hrang hrangah concrete pavement-in siam that a ni a. Concrete hi curing period a la nih avangin kawng a tlo zawk theih nân motor lian te chu zawh tir rih loh a ni a. Amaherawhchu, mamawhna a nasat em avangin ni 21.8.2023 atang hian motor chitin tân he kawng hi hawn mai ni se tiin Mamit SP hnenah pawh thlen a ni.

5) Mamit to Bairabi road siam that: Mamit to Bairabi road hi tun hnaia National Highway-a puan thar a ni a. A kawng chhuat siam that nan Ministry (MoRTH)-in annual plan-ah Rs. 45.00 crore an ruahman a, estimate pawh theh luh tawh a ni. Sanction a nih ve leh tha zawka siam that tum a ni. Tûn dinhmuna kawng chhe zual hnawh tha turin a theih ang anga hmalak a ni a, chak zawka hmalak zêl tum a ni.

6) Dapchhuah to West Phaileng Kawng (18km): Dapchhuah to West Phaileng kawng hi 18km a thui a ni a. He kawng hi MPWD enkawl a nilo. BRO enkawl mek niin MPWD in a chhiat a that ah thu a neilo.

7) Bairabi - Zamuang Kawng (27km): Bairabi-Zamuarig kawng (27km) hi nikum financial year chhung khan a chhe zual lai thawm that niin, hmun dang thenkhat han thawm that tur te a la awm a, heng laite hi siam that mek zel a ni.

A kawng, 7km a awm-Teirei lei (bridge) hi a hlui tawh a, lei thar dawh tura ruahman a ni. Lei thar (80 meter a sei) hi lei hlui bul, lui mawng lam hret ah dawh tura ruahman a ni. Kum 2018 tuilian nasa bikin lei dawhna hmun tura ruahman a ei hek nasat avangin a lei sei zawng hi loh theih lohin 102 meter a tih sei a lo ngai ta a. Hemi avang hian design leh plan tih that vek niin, hna a chak thei ta lo a ni.

Lei thar foundation laih in lei awmsa abutment bul a tih min avangin lei hlui hmanlai hi tum hnih/thum-60 feet laia zawm sei a lo ni tawh a, heti chung hian a design load la thei turin a chak tawk lo a, load restriction 15MT a siam a lo ngai ta a ni.

He lei contractor, Sadguru Engineering & Allied Services hi chak taka hna thawk tura tur reng a ni a. Kumin fur ruah tui zawhah hian nasaleh zuala hma lak a, kum 2024 thal chhunga zawh ngei tura ruahman a ni.

Issued by Engineer-in-Chief, PWD. Mizoram