Tun hnai ruah nasa tak sur avangin Mizoram pumah kawng chhuat bal leh leimin  nasa avangin road block tam tak kan nei a. PWD Field staff lamin a thenfai hna an thawk nghalin thunun theih piah lam harsatna lo thleng thin avanga mipui tawrhna lo thleng thin hi PWD chuan pawi a ti hle a ni.

Serchhip leh Thenzawl inkar Mat lui a Bailey bridge hi a hlui tawh êm avangin motor 10MT a rit chauh kal phal a ni  thin a. Helai kawng hna thawktu Contractor-in lui kaina (diversion road) hi a siam tur a ni a.  Furah kai a har tho avangin lei awmsa  tihchak (strengthen) tura ruahman a ni ta zawk a. Bailey bridge hmun 2-ah thir a do hna chu May 2017 khan tan a ni a. Lui mawngah lung feet 3 a thuk kher hnuah Concrete foundation 2mx2mx0.8m chungah RCC block 2mx2mx1.0m  leh stone masonry 2mx2mx1.5m chungah thir ban lei dona hi a ding a. Foundation concrete hi a hnuai lungah thir 25mm dia 16-in kilh a ni bawk. Nikum fur chhung zawng khan heng ban hi an ding tawh a. Tun kum June thla ruah nasa tak avang khan tui a lo lian a. Lui tui luang chak tak chuan rin loh takin ban pakhat zawk foundation chu tichhiain June Ni 12, 2018 khan a chet sawn tak avangin lei dona chu a pelh ta a. A dona a pelh takah chuan lei a rit phur motor kal tur chu 10MT chin bak kal theih a ni leh ta lova. Hetiang anih avang hian lei hi a him lo thar tihna a ni lova. Do that hma dinhmun ngaiah khan a awm leh tihna a ni. 10MT aia rit motor erawh a kal thei ta lo a ni.

Serchhip Sailiamkawn atanga Keitum lam km chanve-ah kawng chhuat 100m a thui chu June Ni 14, 2018 zing khan a bal vek a, chhim lam nena inpawhna a chat ta hlauh mai a. June Ni 16, 2018 khan District thuneitute leh PWD hotuten a hmunah tlawhin hmalak dan an rel nghal a. NH-54 hi double lane-a laih turah DC-in compensation a pek dawn tho avangin chumi huna pek mai tura ram neitute be felin, June Ni 17, 2018 chawhnu atangin NH Division-IV chuan hna a thawk tan nghal a. Lei minna chungah Electric ban lian ding chu a chim mai a hlauhawm avangin duh anga laih theih a nilo. Harsatna dang a awm loh chuan tun kar tawpah laih tlang hman tuma hma lak a ni. Chumi hnuah lung phah nghal tur a nih avangin motor chitin kal theih chuan kar leh lamah peih beisei a ni. Mipuiten dawh thei taka lo ngaichang hrâm turin PWD chuan a ngen a ni.