Synod Hospital, Durtlang buatsaihin vawiin khan damlo natna khirh tak vei, na tak tuarte tana morphine hman chungchang Opioid Availability Workhsop chu Health Minister Pu Lal Thanzara hovin Chief Minister’s Conference Hall, Aizawlah neih a ni.

Pu Lal Thanzara chuan damlo natna khirh tak vei, tihdam hleih theihloha ngaih hial tawh pallialitive care mamawhte enkawl a pawimawhzia sawiin an nun tihnawmna tur leh na ngawih ngawih an tawrh loh nan morphine hmanga enkawl thu ah medical mite leh mipui tan pawh hemi chungchang hriat zau a tul thu a sawi a. Mithiamte chhut danin khawvelah pallialitive care mamawh mi za zela pakhat chauhin an mamawh ang damdawia enkawl an ni a, heng miten enkawlna tha zawk an dawn theih nana tan lak a tul takzet a ni, a  ti.

India rama Pallialitive care lama sulsutu Kerala atanga lo kal Dr M.R.Rajagopal pawhin thu sawiin nachhawkna damdawi pangngaiin a chhawk zawh tawhloh, damlo na tak tuarte enkawl nana morphine hmang turin doctor leh nurse-ten thiamna bik an neih a ngai a, Narcotic Drugs and Psychotropic Substances Amendment  Act 2014 tha taka kalpui leh damdawi hmansual chingte ban phakloha a mamawhtuten health kaihhnawiha dik taka hman dan ngaihtuah chu thil pawimawh a ni, a ti.

Population Based Cancer Registry India in a tarlan danin Mizoramah kum 2012-14 chhungin cancer vei thar mi 4656 an awm a. Nitin cancer vei thar mi paruk zel awm ang leh Cancer vanga thi hi nitin mi pathum zel awm ang a ni. Non-Communicable Diseases (NCD) Nodal Officer Dr.Eric Zomawia tarlan danin Mizoramah National Programme for Pallialitive Care hi bultan a ni tawh a. Aizawlah Mizoram State Cancer Institute leh Mizoram Institute of Medical Education and Research (MIMER) ah kalpui mek niin Lunglei District Hospital ah tan a ni tawh a, kum 2018-19 chhung hian Kolasib leh Champhaiah bultan tum a ni. December 2006 atang khan damlo mamawhte hnenah morphine a thlawna sem tan a ni a, Directorate of Hospital and Medical Education ah State Palliative Care Cell hawn a ni tawh bawk.