Vawiin khan I&PR Conference Hall, Mamitah National Students' Union of India (NSUI), Mamit Headquarters te'n Mamit khawpui chhunga HSSLC First Division leh Distinction-a Pass tharte chawimawina an nei a. He hunah hian Pu Bhupesh Chaudhary, IAS, Mamit District Bawrhsap chuan khuallian niin Pu Lalhmachhuana, President, NSUI, Gen.Hqrs chu khual sawmbik (Special Guest) a ni.

He hun hmanpuitu Mamit District Bawrhsap chuan zirlai hlawhtlinna changte chu a lawmpui thu sawiin counseling Class leh Awareness bakah zirna lama hmasawnna tur kawng anih chuan zirlaite tan a inphal thu sawiin mel lung an phun chauh a ni tih inhria a, hmathlir thui tak nei turin a chah a. District hmathlir, khawtlang leh chhungkaw nghahfak an nih inhria a, ruihtheihthil leh zirna tibuai thei hrang hrang lama fihlim turin a chah a. Thil thar zir chhuah tum tur leh English thiamna kawnga hmasawn zel turin a chah a. Saptawng a nih vanga kan hlauh thinna hi kan dah bo tur a ni a ti. Tum mumal nei tur leh chumi tihlawhtling tura bei turin a fuih a. An zir zawm lehzelna turah duhsakna a hlan nghal bawk.

Khual sawmbik Pu Lalhmachhuana pawhin thu sawiin NSUI Mamitin zirlai tithate lawmpuina Programme an siam thei chu lawmawm a tih thu leh mihring nunah eng thil pawh ti ila Pass a pawimawh ber a ni a ti. Zirlaite chu ruihhlo laka fihlim a, nulat tlangvalna kawnga fihlim turin a chah a. Zirlai Pass tharte chuan hmabak eng tak an neih thu leh hmachhawn leh tur pawh tam tak an neih thu a sawi a. Tribal Quata kan nei chung pawha Central Service-a inziak tling kan awm hlei thei lo chu chona-a ngai turin zirlaite a chah.

He hunah hian HSSLC Pass tha mi 20 hnenah chawimawina thuziak leh Bible pek an ni. 

Vawiin zirlai tithate chawimawina hun hi Pu ZD. Lalremruata, President, NSUI Hqrs, Mamitin kaihruaiin Pu Lalrinawma ECM, NSUI Hqrs, Mamitin kalkhawmte hnena lawmthu sawina a nei a ni.