Vawiin  khan Market Building Hall Hnahthial-ah Mizo Students Union (MSU) Headquarters Hnahthial chuan South Tuipui Assembly Constituency huam chhunga HSLC leh HSSLC First Division chin chung lama pass mi 93 chawimawina hun an buatsaih a, he hun hi Bialtu MLA Pu John Siamkunga, Chairman Mizoram State Law Commission chuan khuallian niin a hmanpui a, Pu H. Lalramliana, BDO chu khualzahawm niin Pu Biaksiamtluanga, President MSU Regional Hqrs. chu Uaptu a ni bawk.

He hun Pu Malsawmkima, Information Secretary, MSU kaihhruaiah hian khuallian Pu John Siamkunga chuan zirlai titha chawimawina hun MSU in an buatsaih thei chu lawmawm a tih thu te, Hnahthial bial zirna a tlakhniam dan leh hmasawnna awm chhoh dan te a sawi a. Vawiinah hian zirlai tithate chauh kan chawimawi lo che u a, a phen a awm nu leh pate hi an ropui a, in nu, in pa te avanga vawiin hun thleng thei in ni tih in hriat a, lehkha i zir theihna atana i thawh ai thawk a, ei zawnga rim taka thawktute an ni a, chung mite chuan vawiina chawimawi in nih theihna tur hian an rawn phur chhuak che u a ni. Tin hetiang ni thei tura zirtir chhuaktu che u Zirtirtute an fakawm hle bawk, chawimawina an dawng ve lo a ni mai thei, subject hrang hrang letter in hmuh theihna te kha inzirtitu ten thahnem ngai em em a, an zirtirna che u avanga he hun thleng thei hi in tih in hriat a pawimawh tak zet a, engang dinhmunah pawh ding ila min siamtute hi kan hre reng thin tur a ni, a ti bawk.

Pu John Siamkunga chuan Hnahthial khua leh a chhehvela zirna in hma a sawn dan te sawiin infrastructure lamah hma kan la a, school building pawh 20 chuang kan sa a, tun hma ngaihtuah chuan kan result pawhin nasa takin hma a sawn thei ta a, a lawmawm tak zet a ni tiin zirlai naupangte chu kawng an la kal tan dawn chauh avanga nasa leh zuala bei turin te, hlawhchhamna hi min tifingtu a ni fo thin, in zirna kawngah in lo hlawhchham a nih pawhin beidawng lo ula, mi hlawhchham beidawng duh lova bei thin te hi mi hlawhtling an ni fo thin tih hre reng turin a chah a ni. MLA chuan zirlai nih chhunga pawn lam thil chi hrang hrang heng TV te, computer leh thil dang internet leh social media lamtea inhmang lo tur te, ruihtheih thil chi hrang hrang kuhva, sahdah, mezial, zu leh drugs laka fihlim turin a chah a ni.

He hunah hian khualzahawm Pu H. Lalramliana, MCS BDO, Uaptu te Pu RB. Lalmalsawma, President MSU Gen. Hqrs., Pu Biaksiamtluanga, President Regional Hqrs. MSU Lunglei pawhin fuihna thu tha tak tak an sawi a ni.