3111/2024-2025

Dated Serchhip, the 20th November, 2024: Mizoram Building & Other Construction Workers Welfare Board hi ‘Building & Other Construction Workers’ (Regulation of Employment & Condition of Service) Act, 1996, tlawhchhana din a ni. Hemi hnuaiah hian Welfare Fund siam niin, chumi atana member nih dan leh hlawkna awm te chu hetiang hian a ni.

Member nih dan: India khua leh tui diktak kum 18-60 inkar, kumkhat chhunga ni 90 tal inhlawhfate chu member an ni thei a, chungte chu a hnuaia tarlan ang hi a ni.

Contractor emaw midang hnuaia heng hnathawk te:

  1. Carpenter (Thing Mistiri)
  2. Mason (Lungrem Mistiri)
  3. Cement Mistiri
  4. Painter (Rawnghnawih)
  5. Helper (Construction works)
  6. Electrician
  7. Wireman
  8. Fitter
  9. Welder (Thir char)
  10. Plumber
  11. Iron & Aluminium Work
  12. Thirchher
  13. Thingzai
  14. Balu la
  15. Lung la (Quarry-a thawkte)
  16. Rora chhu
  17. Kawng leh Lei laia inhlawh
  18. JCB/Dozer Operator
  19. Constructions Machine Operator
  20. Construction Driver
  21. Leirawhchan siam a inhlawhfate a huam ang.

Amaherawhchu, India ram State/UT Welfare Board hnuaia in register tawhte erawh a huam lo ang.

Member nihna atana document thiltel ngai te:

  1. Voter I.D. Card photocopy . (Voter I.D. a Date of Birth lang lo te tan piankum lan chianna document dang thiltel bawk tur a ni.)
  2. Aadhaar Card photocopy (As per Sec 142 of Code on Social Security, 2020)
  3. Family Ration Card attested photocopy.
  4. Bank Pass Book attested photocopy.
  5. Passport size photo 2 copies.
  6. Local Council/Village Council leh Branch YMA/YLA/MTP hriatpuina.

Membership Fee ngaizat:

  1. Registration Fee ₹25/- a tira pek a ngai.
  2. Thlatin membership tih nun nan ₹10/- pek ziah a ngai a. Amaherawhchu, thlatin pe lovin kumkhat atan ₹120/- pek lawk theih a ni.
  3. Membership Fee/Renewal Fee hi kumthum thleng pe lawk duh tan a pek lawk theih.
  4. Membership card a thih atanga kum khat (1 Year) ral hma ngei a renew thin tur a ni. (As per Sec 17 of BOCW (RECS) Act, 1996)

Member tana hamthatna awm thei te:

1. Member Hmeichhia tan bik:

Member hmeichhia chu nau neih lawmpuina ₹ 10,000/- (Singkhat) pek a ni ang a, member anih atanga fa pahnih a neih thleng a huam ang. Nau neih atanga thlaruk (6 month) chhungin dil theih a ni ang.

2. Pension pangngai leh ramtuileilo avanga Pension:-

  1. Member chu kum 60 a tlin hunah thlatin pension ₹1,000/- (Sangkhat) pek a ni ang a. Kumtin April thla apiangin Life Certificate (a la dam ngei ani tih hriatna lehkha) an thehlut thin tur a ni. Amaherawhchu, Pension tur hian kumthum (3 years) tal member nih a ngai thung. {As per Sec 107(2) of Code on Social Security, 2020}
  2. Member chu kum 60 a tlin hmaa hliam avang emaw natna khirh tak emaw avanga hnathawk thei tawh lo (Medical Board-in disability 40% a pek chin) anih chuan thlatin Pension ₹1,000/- (Sangkhat) pek a ni ang a, a dinhmun a zirin ₹1,00,000/- (Nuaihkhat) thlenga tanpuina pek theih a ni ang.
  3. Member Pension la mek a boral chuan a aiah a nupui hnenah thlatin Pension lak mek zahve (50%) pek chhunzawm theih a ni ang.

3. Thihna chungchanga hamthatna awm theite:-

1. Member hnathawhna hmuna chetsual avanga boralte chu ₹ 3,00,000/- (Nuaihthum) thleng pek theih a ni a, an hnathawhna kaihhnawih ni lo leh chhan dang avanga boral an nih chuan ₹ 1,00,000/- (Nuaihkhat) pek theih a ni thung ang. Thlatin a ₹ 10/- alo thawh tawh tlingkhawm kha pek let leh a ni ang.

2. Member boralte chu a vuina senso tanpuina atan ₹ 5,000/- (Sangnga) pek theih a ni.

3. Member chuan a boral hmaa a chhungte tanpuina dawng tur mumal tak a siamsa loh chuan a hnuaia mi ang hian tanpuina chu pekchhuah mai tur a ni:

1st A Nupui/Pasal

2nd Kumtling lo a fapa/fanu

3rd An fate nupui/pasal la nei lo (upa ber)

4th Member boral ta nu leh pa In khata a chenpuite

5th An fanu pasal then tawh/sun tawh.

6th A monu pasal sun tawh/then tawh.

Member boral atanga thlaruk (6 month) chhungin dil tur a ni.

4. Nupui/pasal neih chungchanga hlawkna awmte:-

  1. Member kumthum tai nitawh tan nupui emaw pasal a neihna hmasa berah ₹ 10,000/- (Singkhat) a lawmpuina pek theih a ni ang.
  2. Member kum thum tai nitawh fate pahnih tan an nupui/pasal neihna hmasa berah ₹ 10,000/- (Singkhat) a lawmpuina pek theih a ni ang.
  3. Nupui/pasal inneih atanga thlaruk (6 month) chhungin dil tur a ni a, dilnaah hian inneih thlalak thiltel tur ani.

5. Dam loh leh chetsual tawh palha hamthatna awmte:-

  1. Member chu chetsual avang emaw natna khirh tak tawk a, Damdawi Ina dah luh a nih chuan a luh ni atanga chhiarin nitin ₹ 1,000/- (Sangkhat) zel a dawng thei ang. Amaherawhchu, a dawn zawng zawng hian kumkhat chhungin ₹ 50,000/- (Singnga) a pel tur a ni lo.
  2. Chronic Diseases (Cancer,Chronic Renal failure, Cerebrovascular Accident/Stroke, Heart Disease with Surgical intervention) vei memberte an inenkawlna senso atan ₹ 1,00,000/- (Nuaih khat) pek theih a ni. Hei hi one time payment tur niin, hemi bakah medical benefit, Board in a kalpui pangai pawh an la tel thei ang.

Damdawiin chhuah atanga thlaruk (6 months) chhungin dil tur a ni.

6. Member fate tana hamthatna awm theite:-

  1. Kum khat tal Member lo ni tawh fate pahnih (2) tan kumtin an lehkha zirna senso tanpui nan hetiang hian pek theih an ni:
    1. KG 1 - Class VIII zirlaite tan pakhat zelah ₹ 4,000/- (Sangli)
    2. Class IX - XII zirlaite tan pakhat zelah ₹ 5,000/- (Sangnga)
    3. Under Graduate zirlaite tan pakhat zelah ₹ 6,000/- (Sangruk)
    4. Industrial Training Institute / Polytechnic Diploma Course zirlaite tan pakhat zelah ₹ 6,000/- (Sangruk)
    5. Professional & Technical Degree Course (from Recognized University) kum 2 (two years) zirlaite tan pakhat zelah ₹ 20,000/- (Singhnih)
    6. Scholars Researchers / Post Graduate Level (from a recognized University) zirlaite tan pakhat tan pakhat zelah ₹ 20,000/- (Singhnih)

Member fate pahnih tan Board viz HSLC, HSSLC leh CBSE a Top 10-atling chinte chu pakhatah ₹ 50,000/- (singnga) a lawmpuina pek theih a ni anga, Distinction a pass chinte tan ₹ 20,000/- (Singhnih) pek theih a ni bawk ang.

Educational Assistance dil hun chhung hi kumtin April - November a ni ang a, Beneficiaries te account ah DBT kaltlangin thun zel tur a ni ang.

7. Skill Development: Member leh an fate tan thiamthil (Skill Development) Welfare Board in a empanelled Training Providers-te hnuaiah Course chi hrang hrang zir theih a ni ang.(As per Section 7(6)(F)of Code on Social Security, 2020)