Mizoram Consultative Forum (MCF) Special Assembly vawi 10-na  I & PR Auditorium a neih chu vawiin khan Pu Lal Thanzara Parliamentary Secretary to Chief Minister chu khuallin niin a hmanpui.

Pu Lal Thanzara chuan MCF chu Kohhran hrang hranga rawngbawltuten ram veina thinlung pua an din chuan Zoram thanna leh hmasawnna atana an ngaihtuahna leh an tha leh zung senga an rawngbawlna chu ropui tiin MCF chu pawl zahawm tak leh chhunawm tak a nih thu a sawi. Sik leh sa tha, boruak thianghlim te ah awm theih nan leh ramngaw leh nungcha humhalh kawngah an hmalakna te chu fakawm tiin, MCF te chu hemi kawngah a tawiawm tur thu a sawi.

Pu Lal Thanzara chuan NLUP chu eizawnna ngelnghet leh rintlak mipui te siamsak a tum piah lamah ramngaw leh nungcha hmuhalh chu NLUP in a tum te zingah mi a nih angin Sorkar laipui pawh in an tuipui thu a sawi. MCF hruaitute chu mipui ten NLUP dik taka an kalpui nan leh a dawngtuten an dinchhuahpui ngei thei turin mipui te zirtira fuih thin turin a chah bawk a ni.

Special Assembly hi Pu V L Bela President, MCF Gen. Hqrs. in a kaihruai a, chawhma lamah Secretary leh Treasurer ten Report pein chawhnu lamah rorel inkhawm an nei.

Mizoram Consultative Forum (MCF) hi kum 1998 Kohhran hruaituten Mizoram in a tha lam zawnga hma a sawm theihna tura hma la tura ding an ni a. Sorkar hmalakna tur tha dappui tur leh thurawn pek te chu an hnathawh pawimawh ber a ni. Kum 2004 atang khan MCF chuan ram tana an hmalakna dang zawng aiin ramngaw leh nungcha humhalh kawngah an in pumpek ta a ni. Ramngaw leh Nungcha humhalh leh kangmei laka invenna lam Awareness Campaign leh Seminar te District huapin vawi engemaw zat an lo buatsaih tawh a. Zokhaw lamah Zotheihuan Project khaw 43 ah an kalpui mek a, ramngaw humhalh Sq. km. 1540 zau khaw hrang hrang ah an nei mek a ni.